કેન્દ્રીય ગૃહ પ્રધાન અમિત શાહે (Minister of Home Affairs: Amit Shah) ગુરુવારે આરોપ લગાવ્યો કે ઇતિહાસકારોએ ભારતનો ઇતિહાસ (India History) ખોટી રીતે લખ્યો છે. તેમણે ઇતિહાસને ફરીથી લખવા પર પણ ભાર મુક્યો હતો. તેમણે કહ્યું કે તોડી મરોડીને રજૂ કરાયેલા ઇતિહાસને સુધારીને ફરીથી લખતા કોઇ રોકી શકે નહીં. તેમણે ઈતિહાસકારોને ભારતીય સંદર્ભમાં ઈતિહાસ ફરીથી લખવાની અપીલ કરી છે. તેમણે આ કામ માટે સરકાર તરફથી સહયોગની ખાતરી પણ આપી છે. 

અમિત શાહે દિલ્હીમાં આસામ સરકારના એક કાર્યક્રમમાં કહ્યું કે હું ઈતિહાસનો વિદ્યાર્થી છું અને મેં ઘણી વખત સાંભળ્યું છે કે આપણા ઈતિહાસને યોગ્ય રીતે રજૂ કરવામાં આવ્યો નથી અને તેને વિકૃત કરવામાં આવ્યો છે. કદાચ તે સાચું હોય, પરંતુ હવે આપણે તે ઠીક કરવાની જરૂર છે.

કેન્દ્રીય ગૃહ પ્રધાન અમિત શાહે કહ્યું કે તોડી મરોડીને રજૂ કરાયેલા ઇતહાસને સુધારી ફરીથી લખતા અમને કોઈ રોકી શકશે નહીં. ઈતિહાસકારો અને વિદ્યાર્થીઓએ ભારતના વિવિધ ભાગોમાં 150 વર્ષથી શાસન કરનારા 30 સામ્રાજ્યો અને દેશની આઝાદી માટે બલિદાન આપનાર 300 થી વધુ વ્યક્તિત્વોનું સંશોધન કરીને સાચો ઈતિહાસ લખવો જોઈએ.

ગૃહમંત્રીએ કહ્યું કે જો લચિત બોરફુકન (Lachit Borphukan) ન હોત, તો પૂર્વોત્તર ભારતનો ભાગ ન હોત કારણ કે તે સમયે તેમના દ્વારા લેવામાં આવેલા નિર્ણયો અને તેમની હિંમતથી માત્ર પૂર્વોત્તર જ નહીં પરંતુ સમગ્ર દક્ષિણ એશિયાને કટ્ટરપંથી આક્રમણકારોથી બચાવ્યું હતું.

તેમણે કહ્યું કે આપણા સ્વતંત્રતા ઈતિહાસના નાયકોના બલિદાન અને સાહસને દેશના ખૂણે ખૂણે લઈ જવાથી આપણી ભાવિ પેઢીઓને પ્રેરણા મળશે. શાહે કહ્યું કે જે દેશના લોકોમાં પોતાના ઈતિહાસમાં ગર્વની ભાવના નથી, તે દેશ ક્યારેય ઉજ્જવળ ભવિષ્ય બનાવી શકતો નથી. તેમણે કહ્યું કે જો દેશનું સોનેરી ભવિષ્ય બનાવવું હોય તો દેશના ઈતિહાસ પર ગર્વ કરવો ખૂબ જ જરૂરી છે.

શાહે આસામના મુખ્યમંત્રી ડો. હિમંતા બિસવા સરમાને હિન્દી અને દેશની અન્ય 10 ભાષાઓમાં લચિત બોરફૂકનના પાત્રનું ભાષાંતર કરવા વિનંતી કરી જેથી દેશના દરેક બાળક તેમની હિંમત અને બલિદાનથી વાકેફ થઈ શકે. ગૃહમંત્રીએ કહ્યું કે વડાપ્રધાન નરેન્દ્ર મોદીના નેતૃત્વ હેઠળની વર્તમાન સરકાર દેશના ગૌરવ માટે કરવામાં આવતા કોઈપણ પ્રયાસને સમર્થન આપે છે. તેમણે કહ્યું કે આપણે ઈતિહાસને વિકૃત કરતા વિવાદોમાંથી બહાર આવવું જોઈએ અને તેને ગૌરવશાળી બનાવીને સમગ્ર વિશ્વની સામે રજૂ કરવું જોઈએ.