અરવિંદ કેજરીવાલે ચાઇનાની વસ્તુઓનો બહિષ્કાર કરવા કરી અપીલ, કહ્યું કેન્દ્રની શું મજબુરી છે ?

દિલ્હીના મુખ્યમંત્રી અરવિંદ કેજરીવાલે કહ્યું કે જ્યારે ચીન સરહદ પર અટકચાળો કરી રહ્યું છે ત્યારે ભાજપની આગેવાની હેઠળની કેન્દ્ર સરકાર શા માટે ચીનથી આયાત ચાલુ રાખી રહી છે ?  તે ચીનનો બહિષ્કાર કેમ નથી કરતી? કેજરીવાલે કહ્યું કે હું લોકોને ચીની વસ્તુઓનો બહિષ્કાર કરવાની અપીલ કરું છું. અમે ભારતીય ઉત્પાદનો ખરીદીશું ભલે તેની કિંમત બમણી હોય. તેમણે કહ્યું કે ભારત સરકારે ચીનના સામાન પર પ્રતિબંધ મૂકવો જોઈએ.

દિલ્હીના સીએમ અરવિંદ કેજરીવાલે કહ્યું કે ચીન તરફથી આપણી સરહદ પર વારંવાર હુમલા થાય છે. કેજરીવાલે કહ્યું કે આપણા જવાનો ચીનની હરકતોનો જડબાતોડ જવાબ આપે છે, પરંતુ ક્યારેક આમાં જવાનો જીવ પણ ગુમાવે છે. આવી સ્થિતિમાં ચીનનો બહિષ્કાર કરવો જોઈએ. તેમણે કહ્યું કે હાલમાં ચીન સાથે 95 અબજ ડોલરનો વેપાર થઈ રહ્યો છે. તેમણે પૂછ્યું કે કેન્દ્રની શું મજબૂરી છે કે ચીન સાથે વેપાર વધી રહ્યો છે.

સીએમ અરવિંદ કેજરીવાલે કહ્યું કે ઉદ્યોગપતિઓ અને ધનિકો ભારત છોડી રહ્યા છે કારણ કે ભાજપ સરકાર તેમને કામ કરવા દેતી નથી. સરકાર  ED અને CBI દ્વારા તેમને પરેશાન કરી રહી છે. તેમણે કહ્યું કે ઇન્ડિયન્સને ભગાડવામાં આવી રહ્યા છે.અને ચીનને ગળે લગાવાઇ રહ્યું છે. તેમણે કહ્યું કે છેલ્લા 5 થી 7 વર્ષમાં 12.5 લાખ લોકોએ દેશ છોડી દીધો છે. CBI અને ED ઉદ્યોગપતિઓની પાછળ છોડી દેવામાં આવે છે અને ચોરોને પાર્ટીમાં સ્થાન આપવામાં આવે છે.

દિલ્હીના સીએમ અરવિંદ કેજરીવાલે મોંઘવારી અંગે પણ કેન્દ્ર સરકાર પર આકરા પ્રહારો કર્યા છે. તેમણે કહ્યું કે જનતા મોંઘવારીથી પરેશાન છે. કેજરીવાલે કહ્યું કે કેન્દ્રના રિપોર્ટ અનુસાર દેશમાં મોંઘવારીનો દર 7 ટકા છે, જ્યારે દિલ્હીમાં તે 4 ટકા છે. તેમણે કહ્યું કે દિલ્હી દેશનું સૌથી સસ્તું શહેર છે કારણ કે અહીં અમે તમામ સુવિધાઓ મફતમાં પ્રદાન કરીએ છીએ. કેજરીવાલે કહ્યું કે સૌથી વધુ મોંઘવારી ભાજપ શાસિત રાજ્યોમાં છે.

આ પણ વાંચોઃ  રાહુલ ગાંધીના ચીન મુદ્દેના નિવેદન પર ભાજપ આક્રમક, જાણો કયા નેતાએ શું આપી પ્રતિક્રિયા