ચેન્નાઈ સામેની મેચમાં સૌથી વધુ રન બનાવનાર તિલક વર્માએ તોડ્યો આ ખાસ રેકોર્ડ

IPL 2022ની 59મી મેચ મુંબઈના વાનખેડે સ્ટેડિયમમાં મુંબઈ ઈન્ડિયન્સ (MI) અને ચેન્નાઈ સુપર કિંગ્સ (CSK) વચ્ચે રમાઇ હતી. જેમા ચેન્નાઇને હારનો સામનો કરવો પડ્યો છે. આ સાથે ટીમની પ્લેઓફમાં જવાની  મહદ આશા પર પણ પાણી ફેરવાઇ ગયું છે. પહેલાથી જ બહાર મુંબઈની ટીમે ચેન્નાઇને હરાવી તેને પણ ટૂર્નામેન્ટથી બહાર કરી દીધી છે. 

સીઝનની મધ્યમાં CSKની કમાન એમએસ ધોનીને સોંપવામાં આવી હતી. વળી રવિન્દ્ર જાડેજાને IPLમાંથી અચાનક જ બહાર કરવામાં આવ્યો. આ મેચમાં, મુંબઈ ઈન્ડિયન્સ (MI) તરફથી રમતા યુવા બેટ્સમેન તિલક વર્માએ સૌથી વધુ રન કર્યા હતા. તેણે 32 બોલમાં ચાર ચોક્કાની મદદથી અણનમ 34 રન બનાવ્યા હતા. આ સાથે તેણે રિષભ પંતનો પાંચ વર્ષ જૂનો ખાસ રેકોર્ડ તોડી નાખ્યો છે. 19 વર્ષીય તિલકે આ સિઝનમાં 12 મેચમાં 368 રન બનાવ્યા છે. તે ટીનેજર તરીકે IPLમાં સૌથી વધુ રન બનાવનારો ખેલાડી બની ગયો છે. આ પહેલા આ રેકોર્ડ રિષભ પંતના નામે હતો. પંતે 2017માં દિલ્હી ડેરડેવિલ્સ (હવે દિલ્હી કેપિટલ્સ) તરફથી રમતા 14 મેચોમાં 366 રન બનાવ્યા હતા. આ યાદીમાં ત્રીજા નંબર પર પૃથ્વી શૉ છે, જેણે 2019માં 16 મેચમાં 353 રન બનાવ્યા હતા. મહત્વનું છે કે, તિલક વર્માને મુંબઈએ મેગા ઓક્શનમાં 1.7 કરોડ રૂપિયામાં ખરીદ્યો હતો. આ સિઝનમાં અત્યાર સુધી તેણે મુંબઈ ઈન્ડિયન્સ માટે સૌથી વધુ રન બનાવ્યા છે. વળી, 15.25 કરોડમાં સોલ્ડ થયેલો ઇશાન કિશન 12 મેચમાં 327 રન સાથે બીજા નંબર પર છે.