ઉમરાન મલિકના આ દિગ્ગજ ક્રિકેટરે કર્યા વખાણ, જલ્દી જ ટીમ ઈન્ડિયામાં જોવા માગે છે

બુધવારે 27 એપ્રિલ મુંબઈના વાનખેડે સ્ટેડિયમમાં ગુજરાત ટાઇટન્સ અને સનરાઇઝર્સ હૈદરાબાદ વચ્ચે શાનદાર મેચ જોવા મળી હતી. ગુજરાત ટાઇટન્સ અને સનરાઇઝર્સ હૈદરાબાદ વચ્ચેની આ મેચમાં ગુજરાતે હૈદરાબાદને પાંચ વિકેટે હરાવ્યું હતું. હૈદરાબાદની ટીમ ભલે મેચ હારી ગઇ હોય પરંતુ ટીમનો એક ખેલાડી સતત લોકોના દિલ જીતી રહ્યો છે. 

હૈદરાબાદના યુવા ફાસ્ટ બોલર ઉમરાન મલિકે આ સમયે તમામ દિગ્ગજ ખેલાડીઓથી લઇને રાજનેતાઓનું પોતાની તરફ ધ્યાન ખેંચ્યું છે. તેણે ગુજરાતના કેપ્ટન હાર્દિક પંડ્યા અને શુભમન ગિલ સહિત પાંચ ટોપ ઓર્ડર બેટ્સમેનને આઉટ કરી ગુજરાતની ટીમને શરૂઆતી ઝટકા આપ્યા હતા. જોકે, તેના પ્રદર્શન બાદ પણ ટીમ જીતી શકી ન હતી. પ્રથમ બેટિંગ કરતા સનરાઇઝર્સ હૈદરાબાદે ગુજરાત સામે 196 રનનો ટાર્ગેટ આપ્યો હતો. ટીમે છેલ્લા બોલમાં 5 વિકેટ બાકી રહેતા આ સ્કોર હાંસલ કર્યો હતો. ઉમરાન મલિક સિવાય હૈદરાબાદનો કોઈ બોલર વિકેટ લઈ શક્યો નહતો. જોકે, ઉમરાનની સ્પીડ જોઈને ફરી એકવાર દિગ્ગજ ખેલાડીઓ તેનાથી પ્રભાવિત થયા છે અને તેના ખૂબ વખાણ પણ કરી રહ્યા છે. ભૂતપૂર્વ ક્રિકેટર સુનીલ ગાવસ્કરે તો ત્યાં સુધી કહ્યું કે, આ બોલરને ઈંગ્લેન્ડના પ્રવાસ પર લઈ જવો જોઈએ.

થોડા સમય પહેલા સ્ટાર સ્પોર્ટ્સ ક્રિકેટ લાઈવ પર ગાવસ્કરે જણાવ્યું હતું કે, તે તેની ગતિથી ખૂબ પ્રભાવશાળી રહ્યો છે. પરંતુ તેની ઝડપ કરતાં વધુ, તે તેની ચોકસાઈથી વધુ પ્રભાવિત કરે છે. તે ગતિએ બોલિંગ કરનારા ઘણા લોકો બોલને આસપાસ ફેંકી દે છે. પરંતુ ઉમરાન બહુ ઓછા વાઈડ બોલ કરે છે. જો તે લેગ સાઇડના વાઈડ પર કંટ્રોલ કરી શકે તો મને લાગે છે કે તે એક મહાન બોલર બની શકે છે. હું આ એટલા માટે કહી રહ્યો છું કારણ કે તે હંમેશા સ્ટમ્પ પર હુમલો કરશે અને પછી સ્પીડને કારણે તેને મારવું ઘણું મુશ્કેલ બનશે. જો મલિક વિકેટ-ટૂ-વિકેટ બોલિંગ કરશે તો તે વિકેટ લેનાર બોલર હશે અને દેશ માટે બહુ જલ્દી રમશે.