જાડેજા બાદ હવે દિલ્હીનો આ ખેલાડી પણ ટૂર્નામેન્ટમાંથી બહાર

ગુરુવારે મુંબઈએ ચેન્નાઇને હરાવી તેની પ્લેઓફની આશા પર પાણી ફેરવી દીધુ છે. આ મેચમાંથી ટીમનો સ્ટાર ખેલાડી રવિન્દ્ર જાડેજા બહાર હતો. જોકે, તે ટૂર્નામેન્ટમાંથી જ બહાર થઇ ગયો છે. ત્યારે હવે વધુ એક ખેલાડી પણ આ ટૂર્નામેન્ટમાંથી બહાર થઇ ગયો છે.

IPL 2022 ના પ્લેઓફમાં જગ્યા બનાવવા માટે સંઘર્ષ કરી રહેલી દિલ્હી કેપિટલ્સની ટીમને મોટો આંચકો લાગ્યો છે. ટીમનો ઓપનર પૃથ્વી શો ટૂર્નામેન્ટમાંથી બહાર થઈ ગયો છે. જોકે, ફ્રેન્ચાઈઝીના સત્તાવાર નિવેદનની હજુ રાહ જોવાઈ રહી છે. દિલ્હી કેપિટલ્સનો ઓપનર પૃથ્વી શૉ, જે છેલ્લા કેટલાક સમયથી તાવથી પીડિત છે, તે હજુ સુધી સાજો થયો નથી. ટીમના સહાયક કોચ શેન વોટસને ગુરુવારે જણાવ્યું હતું કે, તેણે ગયા બુધવારે રાજસ્થાન રોયલ્સ સાથે મેચ બાદથી 3 મેચ રમી નથી. તે હજુ પણ સ્વસ્થ નથી. બીજી તરફ, દિલ્હી કેપિટલ્સના કેપ્ટન રિષભ પંતે કહ્યું કે તે લગભગ ટાઈફોઈડથી પીડિત છે. મહત્વનું છે કે, પૃથ્વી શૉને થોડા સમય પહેલા તાવ અને નબળાઈના કારણે હોસ્પિટલમાં દાખલ કરવામાં આવ્યો હતો. તેણે તેની છેલ્લી મેચ 1 મેના રોજ લખનૌ સુપરજાયન્ટ્સ સામે રમી હતી. દિલ્હી કેપિટલ્સના કેપ્ટન રિષભ પંતે પણ કહ્યું હતું કે, શોને ટાઈફોઈડ થયો છે. બીજી તરફ, પૃથ્વી શૉએ રવિવારે તેની ઈન્સ્ટાગ્રામ સ્ટોરી પર હોસ્પિટલના રૂમમાંથી એક તસવીર શેર કરી અને લખ્યું કે, "હોસ્પિટલમાં દાખલ અને તાવમાંથી સ્વસ્થ થઈ રહ્યો છું. તમારી શુભકામનાઓ બદલ આપ સૌનો આભાર. ટૂંક સમયમાં જ એક્શનમાં આવીશ."