કેન વિલિયમસનના શંકાસ્પદ કેચ આઉટ પર ઉઠ્યા સવાલ, ફેન્સ બોલ્યા- એમ્પાયર 3D ચશ્મા પહેરીને બેઠા

ઈન્ડિયન પ્રીમિયર લીગ (IPL)ની પાંચમી મેચમાં સનરાઈઝર્સ હૈદરાબાદ અને રાજસ્થાન રોયલ્સ વચ્ચે રમાઇ હતી. આ મેચ ખાસ કરીને કેપ્ટન કેન વિલિયમસનને લઇને ચર્ચામાં આવી છે. જીહા, આ મેચમાં તેને જે રીતે આઉટ કરવામાં આવ્યો તે અંગે સોશિયલ મીડિયા પર ઉગ્ર ચર્ચા ચાલી રહી છે. 

સનરાઈઝર્સ હૈદરાબાદ અને રાજસ્થાન રોયલ્સ વચ્ચે રમાયેલી પ્રથમ મેચમાં કેન વિલિયમસન જે રીતે આઉટ થયો તે અંગે હવે સવાલો ઉભા થઈ રહ્યા છે. થર્ડ એમ્પાયર દ્વારા આપવામાં આવેલા નિર્ણય બાદ ચાહકો ટ્વિટર પર ગુસ્સો કાઢી રહ્યા છે. મહત્વનું છે કે, હૈદરાબાદની બેટિંગની બીજી ઓવર દરમિયાન પ્રસિદ્ધ કૃષ્ણાની ઓવરની ચોથી બોલ પર કેન વિલિયમસનના બેટની કિનારી લાગી અને બોલ વિકેટકીપર સંજૂ સેમસનના ગ્લવ્ઝ તરફ ગયો. જોકે, સંજુ સેમસન કેચ લેવામાં સફળ ન થઈ શક્યો અને બોલ તેના હાથમાંથી સરકીને સ્લિપ તરફ ગયો. સ્લિપ પર ઉભેલા દેવદત્ત પડિકલે કેચ પકડ્યો હતો પરંતુ પ્રથમ ઝલક જોયા બાદ એ જાણી શકાયું નહી કે દેવદત્ત પડિકલે કેચ બરાબર પકડ્યો હતો કે નહીં. ઓનફિલ્ડ એમ્પાયરે ત્રીજા એમ્પાયરને નિર્ણય સંભળાવવાનું કહ્યું. આ શંકાસ્પદ કેચ થોડા સમય માટે થર્ડ એમ્પાયરે જોયો હતો, ત્યારબાદ થર્ડ એમ્પાયરે તેને આઉટ જાહેર કર્યો હતો. વિલિયમસન 7 બોલમાં 2 રન બનાવીને આઉટ થયો હતો. યુઝર્સ આ કેચને લઈને ઉગ્ર ચર્ચા કરી રહ્યા છે અને થર્ડ એમ્પાયરને ખૂબ ટ્રોલ કરી રહ્યા છે.