Pakistan : શિયા-સુન્ની આવ્યા આમને-સામને, હિંસામાં 25 લોકોના મોત

• પાકિસ્તાનમાં શિયા-સુન્ની અથડામણ: 25 મોત
• હિંસા અટકાવવા માટે શાંતિ કરારનો પ્રયાસ
• અગાઉ પણ હિંસા થઇ ચુકી છે

Pakistan Shia Sunni Clash : પાકિસ્તાનના ઉત્તર-પશ્ચિમ વિસ્તારમાં જમીન વિવાદને લઈને શિયા અને સુન્ની સમુદાયના લોકો વચ્ચે ઘણા દિવસોથી ચાલી રહેલી અથડામણમાં ઓછામાં ઓછા 25 લોકોના મોત થયા હોવાનું સામે આવ્યું છે. અધિકારીઓએ આ અંગે માહિતી આપી છે. અધિકારીઓએ જણાવ્યું હતું કે, અફઘાનિસ્તાનની સરહદે આવેલા ઉત્તર પશ્ચિમ ખૈબર પખ્તુનખ્વા પ્રાંતના કુર્રમ જિલ્લામાં ગયા અઠવાડિયે અંતમાં શરૂ થયેલી અથડામણ બુધવારે પણ ચાલુ રહી હતી. તેમણે કહ્યું કે, શનિવારથી શરૂ થયેલી અથડામણમાં બંને પક્ષના ઘણા લોકો ઘાયલ થયા છે.

વિવાદનું શું છે કારણ?

કુર્રમ તાજેતરના વર્ષોમાં સાંપ્રદાયિક હિંસાનું કેન્દ્ર રહ્યું છે. અધિકારીઓએ જણાવ્યું હતું કે તેઓ દેશના અશાંત ઉત્તર-પશ્ચિમ વિસ્તારમાં જમીન વિવાદને સાંપ્રદાયિક હિંસા તરફ વળવાથી રોકવાનો પ્રયાસ કરી રહ્યા છે. બંને તરફથી હિંસક જૂથો પણ આ વિસ્તારમાં સક્રિય છે. પ્રાંતીય સરકારના પ્રવક્તા બેરિસ્ટર સૈફ અલીએ જણાવ્યું હતું કે અધિકારીઓ વડીલોની મદદથી તણાવ ઓછો કરવાનો પ્રયાસ કરી રહ્યા છે. તેમણે કહ્યું કે, કુર્રમમાં શાંતિ વાટાઘાટો બાદ બંને પક્ષો કોઈપણ પ્રકારની હિંસા ન કરવા સંમત થયા છે.

અગાઉ પણ હિંસા થઈ હતી

સુન્ની પ્રભુત્વ ધરાવતા પાકિસ્તાનની 240 મિલિયનની વસ્તીમાંથી લગભગ 15 ટકા શિયા મુસ્લિમો છે. બંને સમુદાયો વચ્ચે ઘણા સમયથી તણાવ ચાલી રહ્યો છે. જોકે બંને સમુદાયના લોકો દેશમાં મોટાભાગે શાંતિપૂર્ણ રીતે રહે છે, કેટલાક વિસ્તારોમાં, ખાસ કરીને કુર્રમ જિલ્લાના કેટલાક ભાગોમાં જ્યાં શિયા સમુદાયનું વર્ચસ્વ છે ત્યાં દાયકાઓથી તેમની વચ્ચે તણાવ છે. આ વર્ષે જુલાઈમાં પણ જમીન વિવાદને લઈને બંને પક્ષના ઘણા લોકોના મોત થયા હતા.

બંને પક્ષો વચ્ચે સમજૂતી થઈ હતી

જુલાઈમાં, કુર્રમ જિલ્લામાં હિંસક અથડામણમાં સામેલ આદિવાસીઓએ હિંસાનો અંત લાવવા માટે શાંતિ કરાર પર હસ્તાક્ષર કર્યા હતા. કરાર હેઠળ, બંને પક્ષો જાહેર વ્યવસ્થા જાળવવામાં સરકારને સહકાર આપવા સંમત થયા હતા. કરાર અનુસાર, શાંતિ કરારનું ઉલ્લંઘન કરનાર પક્ષને 12 કરોડ રૂપિયા સુધીનો દંડ ભરવો પડશે.

આ પણ વાંચો:  Israel-Lebanon war ના તણાવ વચ્ચે ભારતીય નાગરિકોને લેબનોન જલ્દી છોડી દેવાની સલાહ