ચીનમાં ઝીરો કોરોના પોલિસીના વિરોધમાં લોકો રસ્તે ઉતર્યા, 'શી જિનપિંગ ખુર્સી છોડો'ના લાગાવ્યા નારા

અહેવાલ મુજબ, દૂરના ઉત્તર-પશ્ચિમ શહેર ઉરુમકીમાં વિરોધ પ્રદર્શન પછી દેશના ઘણા ભાગોમાં કોવિડ વિરુદ્ધ અશાંતિ ફેલાઈ ગઈ. મળતી માહિતી મુજબ અહીંના એક ટાવર બ્લોકમાં લાગેલી આગમાં 10 લોકોના મોત થયા છે. લોકોએ આ માટે કડક લોકડાઉનને જવાબદાર ઠેરવતા ઉગ્ર વિરોધ કર્યો છે. રવિવારે રાત્રે શાંઘાઈમાં સેંકડો વિરોધીઓ અને પોલીસ વચ્ચે અથડામણ થઈ હતી. શનિવારની રાત્રે શાંઘાઈમાં વિરોધ પ્રદર્શન દરમિયાન, લોકો ખુલ્લેઆમ "શી જિનપિંગ, પદ છોડો" અને "કમ્યુનિસ્ટ પાર્ટી સત્તા છોડો" જેવા નારા લગાવ્યા હતા. લોકો ખાલી બેનરો પકડેલા જોવા મળ્યા હતા, જ્યારે અન્ય લોકોએ ઉરુમકીમાં પીડિતોને શ્રદ્ધાંજલિ આપવા માટે મીણબત્તીઓ પ્રગટાવી હતી અને ફૂલો મૂક્યા હતા. આવી માંગણીઓ ચીનની અંદર એક અસામાન્ય દૃશ્ય છે, જ્યાં સરકાર અને રાષ્ટ્રપતિની કોઈપણ સીધી ટીકા કઠોર સજામાં પરિણમી શકે છે.

ચીનમાં સરકાર વિરૂદ્ધ વિરોધ દિવસેને દિવસે વધી રહ્યો છે. સોમવારે, બેઇજિંગમાં થર્ડ રિંગ રોડ પાસે વિરોધીઓની મોટી ભીડ એકઠી થઈ. આ દરમિયાન લગભગ 1000 લોકોએ સરકાર વિરોધી નારા લગાવ્યા હતા. વિરોધીઓએ 'અમને માસ્ક નથી જોઈતા, અમને આઝાદી જોઈએ છે' ના નારા લગાવ્યા હતા. 'અમને કોવિડ ટેસ્ટ નહીં પણ આઝાદી જોઈએ છે'ના નારા લગાવ્યા. શાંઘાઈમાં હજારો વિરોધીઓ બહાર આવ્યા, જ્યાં લોકોને પોલીસની કારમાં લઈ જવામાં આવ્યા હતા. બેઇજિંગ અને નાનજિંગ સહિત અન્ય સ્થળોએ યુનિવર્સિટીઓમાં વિદ્યાર્થીઓ પ્રદર્શન કરતા જોવા મળ્યા હતા. શનિવારે ચીનમાં 34,398 કોરોના કેસ નોંધાયા હતા. શુક્રવારે, આંકડો 31,928 હતો, જે ચેપની સંખ્યામાં તાજેતરના ઉછાળાને દર્શાવે છે.

ચીનના ડઝનેક શહેરોમાંથી એક સાથે સામે આવી રહેલા વિરોધ પ્રદર્શનની આ તસવીરો દુર્લભ કહેવામાં આવી રહી છે, કારણ કે ચીનમાં સરકાર વિરુદ્ધ એક શબ્દ પણ બોલવાની છૂટ નથી અને આવી સ્થિતિમાં હજારો લોકો ખુલ્લેઆમ આગળ આવ્યા અને વિરોધમાં ભાગ લીધો છે, જેને તદ્દન દુર્લભ માનવામાં આવે છે. આ પહેલા ચીનમાં 1989માં તિયાનમેન સ્ક્વેર પર પ્રદર્શન થયું હતું, જેમાં કમ્યુનિસ્ટ પાર્ટી દ્વારા હજારો લોકોને મારી દેવામાં આવ્યા હતા. ચીનમાં રાષ્ટ્રપતિ શી જિનપિંગ સામે અસહમત થવાનો લોકોને અધિકાર નથી અને લોકોએ ભારે સેન્સરશીપ હેઠળ જીવવું પડે છે. 

પરંતુ, એવું પહેલીવાર બન્યું છે કે પ્રદર્શનમાં સામેલ લોકો સીધા જ શી જિનપિંગના રાજીનામાની માંગ કરી રહ્યા છે. વળી, રોઇટર્સના જણાવ્યા અનુસાર, પર્સનલ ચેટમાં જોડાવા જતા લોકો અને ચાઇનીઝ સોશિયલ મીડિયા પર એકબીજાને વ્હાઇટ પેપર સાથે લેવાની સલાહ આપી રહ્યા છે. જણાવી દઈએ કે, આ પહેલા વર્ષ 2020માં હોંગકોંગમાં લોકશાહી તરફી આંદોલનકારીઓએ પણ શ્વેતપત્ર સાથે પ્રદર્શન કર્યું હતું, પરંતુ શી જિનપિંગની સરકાર દ્વારા લોકોના પ્રદર્શનને ક્રૂરતાથી કચડી નાખવામાં આવ્યું હતું અને પ્રદર્શનમાં સામેલ નેતાઓને જેલની સજા કરવામાં આવી રહી છે.

ગુજરાતની નંબર 1 ગુજરાતી ન્યૂઝ ચેનલ એટલે ગુજરાત ફર્સ્ટ (Gujarat First) - જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ગુજરાત ફર્સ્ટ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android અને iOS એપ. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.