રાજકોટ અને ગોંડલમાં ફ્લાઇંગ સ્ક્વોર્ડ દ્વારા મધરાતે વાહન ચેકિંગ

ગુજરાત વિધાનસભાની ચૂંટણી (Gujarat Assembly Election)ની તડામાર તૈયારી ચાલી રહી છે. જેના ભાગરુપે વહિવટીતંત્ર પણ એલર્ટ બની ગયું છે ત્યારે સમાચાર મળી રહ્યા છે કે રાજકોટ (Rajkot) શહેર- ગ્રામ્ય અને ગોંડલ (Gondal) વિધાનસભા મતક્ષેત્રમાં મંગળવારે રાત્રે ફ્લાઈંગ સ્ક્વોડ સહિતની ટીમો દ્વારા સઘન  વાહન ચેકિંગ શરુ કરવામાં આવ્યું છે. 

રાજકોટ જિલ્લામાં વિધાનસભાની મુક્ત અને ન્યાયી ચૂંટણી યોજવા માટે જિલ્લા ચૂંટણી અધિકારી અરૂણ મહેશ બાબુના માર્ગદર્શનમાં જિલ્લાનું ચૂંટણી તંત્ર એક્શન મોડમાં છે. જિલ્લાના વિવિધ વિધાનસભા મત વિસ્તારોમાં વિવિધ ટીમો દ્વારા તપાસ, સર્વેલન્સની કામગીરી શરૂ કરી દેવામાં આવી છે. રાજકોટ ગ્રામ્ય અને ગોંડલ વિધાનસભા મત વિસ્તારના ચૂંટણી અધિકારીઓના માર્ગદર્શન હેઠળ મંગળવારે રાત્રે ફ્લાઈંગ સ્ક્વોડની ટીમ તથા સ્ટેટિક સર્વેલન્સ ટીમ વગેરેએ વાહન ચેકિંગની કામગીરી હાથ ધરી હતી. 

ચૂંટણી અધિકારીઓએ જણાવ્યું હતું કે રાજકોટ ગ્રામ્ય અને  ગોંડલ વિધાનસભા મત વિસ્તારમાં 3 ફ્લાઈંગ સ્કવોર્ડ અને 3 એસ.એસ.ટી.ની ટીમો દ્વારા સરપ્રાઈઝ ચેકીંગ તેમજ પેટ્રોલીંગ રાઉન્ડ ધ ક્લોક કરવામાં આવી રહ્યું છે. 

આ સાથે જ બેડી ચોકડી અને મોરબી રોડ ખાતે તથા કાલાવડ રોડ ખાતે મંગળવારે રાત્રે રિટર્નિંગ ઓફિસરના માર્ગદર્શન હેઠળ એસએસટી - સ્ટેટિક સર્વેલન્સ ટીમો દ્રારા સરપ્રાઇઝ ચેકીંગ કરાયું હતું. આ કામગીરીમાં વિડિઓ સર્વેલન્સ, વિડિઓ વ્યુઈગ, ફ્લાઈંગ સ્કવોડ વગેરે સામેલ હતી.

બીજી તરફ કેન્દ્રીય ચૂંટણી પંચ દ્વારા ગુજરાત વિધાનસભા સામાન્ય ચૂંટણીને લઈને મતદાતાઓ લોકશાહીના પર્વમાં જોડાય તે માટે રાજકોટ જિલ્લા ચૂંટણી તંત્ર દ્વારા સ્વસ્થ અને સ્વચ્છ પર્યાવરણની જાગૃતિભર્યા સંદેશા સાથે જિલ્લાની 8 વિધાનસભાની બેઠકોમાં ઈકો ફ્રેન્ડલી મતદાન મથકની રચના કરવામાં આવશે. જિલ્લાની 8 વિધાનસભા બેઠક દીઠ દરેક બેઠકમાં એક પ્લાસ્ટીકમુક્ત મતદાન મથક તૈયાર કરવામાં આવશે.

રાજકોટ જિલ્લાના આઠ વિધાનસભા મતવિસ્તાર અન્વયે  - રાજકોટ ઈસ્ટ ઝોનમાં ભાવનગર રોડ ખાતેની ગવર્મેન્ટ પોલીટેકનીક કોલેજના રૂમ નંબર ૧, રાજકોટ વેસ્ટ ઝોનમાં આવેલા રૈયા ખાતેના આર.એમ.સી. વોર્ડ નંબર ૧,  રાજકોટ સાઉથ ઝોનમાં અંબાજી કડવા પ્લોટમાં આવેલી આર.એમ.સી. સ્કૂલ નંબર ૬૯ના નવા બિલ્ડીંગના રૂમ નંબર ૦૩,  રાજકોટ ગ્રામ્યમાં ૭ - રામનગર પ્રાથમિક શાળાના રૂમ નં.૧,  જસદણમાં ૧૦૨, ચિતલીયા નવી પ્રાથમિક શાળા, અર્જુન બ્લોક, ચિતલીયા, ગોંડલમાં ૧૦૭ - અટલ જનસેવા કેન્દ્ર, જેલ ચોક, ગોંડલ,  જેતપુરમાં ૧૩૧ - કાગવડ - ૨, પ્રાથમિક શાળા, કાગવડ, - ધોરાજીમાં ઉપલેટાની ટી. જે.ગર્લ્સ હાઈસ્કુલ, ઉપલેટા ખાતે ઈકો ફ્રેન્ડલી મતદાન મથકો ઉભા કરવામાં આવશે.

આ પણ વાંચો--ચૂંટણીને ધ્યાને લઈ દાહોદ આંતરરાજ્ય બોર્ડર વિસ્તારમાં ચોકીઓ ગોઠવાઈ