ડબલ એન્જિન સરકારથી સુરતનો દરેક ક્ષેત્રે વિકાસ: PM MODI

વડાપ્રધાનશ્રી નરેન્દ્ર મોદી (Narendra Modi)નો ગુજરાત (Gujarat)  પ્રવાસ શરુ થયો છે. ગુરુવારે સવારે સવા દસ વાગે વડાપ્રધાનશ્રી મોદી સુરત એરપોર્ટ ખાતે પહોંચ્યા હતા, જ્યાં તેમનું પદાધિકારીઓ અને વહિવટીતંત્ર દ્વારા સ્વાગત કરાયું હતું. 

સુરતના નિલગીરી મેદાનમાં સભાને સંબોધન કરતાં વડાપ્રધાનશ્રી નરેન્દ્ર મોદીએ કહ્યું કે બહારથી આવનાર લોકો પણ સુરતીલાલાના રંગમાં રંગાઇ જાય છે.  હું કાશીનો એમપી છું અને લોકો કહે છે કે સુરતનું જમણ અને કાશીનું મરણ. તાપીના કિનારા સહિત સુરતને વધુ આધુનિક બનાવવા ભૂપેન્દ્રભાઇ અને સીઆરપાટીલ, કોર્પોરેશન અને ધારાસભ્યોને અભિનંદન આપું છું. બાયોડાર્વસિટી પાર્ક મળતાં લોકોને નવી સુવિધા મળશે. અહીં અનેક લોકો એવા છે કે જેમણે એરપોર્ટ માટેના સંઘર્ષ જોયો છે. તે વખતે દિલ્હીમાં સરકાર હતી તેને જણાવતા જણાવતા થાકી ગયા હતા. આજે જુઓ અહીંથી કેટલી ફ્લાઇટ જાય છે. કેટલા લોકો આવે છે. એવી જ સ્થિતિ મેટ્રોની હતી પણ આજે ડબલ એન્જીનની સરકાર છે તેથી સ્વીકૃતી પણ તેજીથી થાય છે અને કામ પણ ઝડપથી થાય છે. 

વડાપ્રધાને કહ્યું કે અમારી સરકાર વેપારીઓની જરુરીયાત મુજબ કામ કરી રહી છે. સુરત ઘોઘા ફેરીથી સુરતને લાભ થયો છે. માલસામાન માટે કાશી સુધીની ટ્રેન શરુ કરાશે જેનો લાભ વેપારીઓ અને શ્રમીકોને થશે. ઇલેકટ્રીકથી ચાલનારી ગાડીઓ માટે પણ સુરત ઓળખાશે. સિલ્ક સિટી, ડાયમંડ સિટી અને સેતુ સિટી તથા હવે ઇલેકટ્રીક ગાડીઓનું શહેર તરીકે સુરત ઓળખાશે. સુરતમાં આજે 35 ચાર્જીંગ સ્ટેશન નું લોકાર્પણ કરાયું છે. અને આગામી સમયમાં 500 ચાર્જીંગ સ્ટેશન બનશે. જે રીતે વિકાસના રસ્તે સુરત ચાલે છે તે આગામી સમયમાં વધશે. જે ડબલ એન્જિન સરકાર પ્રત્યેનો વિશ્વાસ દર્શાવે છે. 

વડાપ્રધાનશ્રીએ નવરાત્રીની દરેકને શુભકામના પાઠવી હતી. તેમણે સભાને સંબોધન કરતાં કહ્યું કે  સુરતમાં ઝુંપડપટ્ટી દુર કરીને 80 હજાર ઘર બનાવ્યા છે. પીએમ સ્વ નિધી યોજનામાં 35 લાખ લોકોને લાભ મળ્યો છે. છેલ્લા 2 દાયકામાં સુરતનો વિકાસ થયો છે. સુરત શહેર જનભાગીદારીનું શ્રેષ્ઠ ઉદાહરણ છે. દેશના સૌથી સ્વચ્છ શહેરોમાં સુરતની ગણના થાય છે. વડાપ્રધાનશ્રીએ કહ્યું કે છેલ્લા 20 વર્ષમાં સુરતે સૌથી વધુ પ્રગતી કરી છે. સુરતની ઇન્ટરસિટી કનેક્ટિવીટી શ્રેષ્ઠ છે.તેમણે એમ પણ કહ્યું કે ડ્રેનેજ નેટવર્કે સુરતને નવી ઓળખ આપી છે. 

સુરત એરપોર્ટ પર વડાપ્રધાનશ્રીનું સીએમ ભૂપેન્દ્ર પટેલ અને ભાજપ પ્રમુખ સી.આર.પાટીલે સ્વાગત કર્યું હતું. 

વડાપ્રધાનશ્રી નરેન્દ્ર મોદીએ સુરતમાં 3400 કરોડના વિકાસકાર્યોના લોકાર્પણ-ખાતમુહૂર્ત કર્યું હતું. તેઓએ ડ્રીમ સીટી ફેઝ-1નું લોકર્પણ તથા ફેઝ-2નું ખાતમુહૂર્ત પણ કર્યું હતું. ઉપરાંત 9.53 કરોડના ખર્ચે બનેલ ડ્રીમ સિટીના ભવ્ય ગેટનું લોકાર્પણ કર્યું હતું અને જૈવવિવિધતા પાર્કનો શિલાન્યાસ પણ કર્યો હતો.