સુરતમાં ઓવૈસીની જાહેરસભામાં લાગ્યા મોદી-મોદીના નારા

રાજ્યમાં વિધાનસભાની ચૂંટણીને લઇને તમામ પાર્ટીઓ જનતાને પોતાની તરફ ખેંચવાનો પૂરો પ્રયત્ન કરી રહી છે. ત્યારે આ વખતે ઓલ ઈન્ડિયા મજલિસ-એ-ઈત્તેહાદુલ મુસ્લિમીન (AIMIM)ના ઉમેદવારો પણ ચૂંટણી લડી રહ્યા છે. તેમની તરફેણમાં AIMIMના વડા અસદુદ્દીન ઓવૈસી રવિવારે જાહેર સભા કરવા સુરત પહોંચ્યા હતા, પરંતુ ત્યાં તેમને ખરાબ પરિસ્થિતિનો સામનો કરવો પડ્યો હતો. ઓવૈસીની આ જાહેરસભાનો ઉગ્ર વિરોધ કરવામાં આવ્યો હતો. યુવાનોના એક મોટા જૂથે ઓવૈસીને કાળા ઝંડા લહેરાવ્યા હતા. આ યુવાનોએ ઓવૈસીની જાહેરસભામાં મોદી-મોદીના નારા પણ લગાવ્યા હતા.

અસદુદ્દીન ઓવૈસીની આ જાહેરસભા સુરતના રૂદરપુરા વિસ્તારમાં હતી. સ્ટેજ શણગારવામાં આવ્યું હતું. જ્યારે ઓવૈસી બોલવા માટે ઉભા થયા તો વિરોધ શરૂ થઇ ગયો. પાછળ ઉભેલા યુવાનોના જૂથે કાળા કપડા અને ઝંડા લહેરાવવાનું શરૂ કર્યું. તેઓ સતત મોદી-મોદીના નારા પણ લગાવી રહ્યા હતા. જોકે, આ સૂત્રોચ્ચાર અને કાળા ઝંડા લહેરાવવામાં આવ્યા તે દરમિયાન ઓવૈસી અટક્યા ન હોતા. તેઓ ભાષણ આપતા જ રહ્યા. અસદુદ્દીન ઓવૈસીની કોઈપણ જાહેર સભામાં કાળા ઝંડા ફરકાવવાની આ પહેલી ઘટના છે. ઓવૈસીએ વિરોધ કરનારાઓને પણ કશું કહ્યું નહીં. તેમણે તેમના પક્ષના ઉમેદવારોની તરફેણમાં વાત કરી હતી. લોકોને જણાવ્યું કે, AIMIM ઉમેદવારો ચૂંટણી જીતશે તો તેઓ કયા મુદ્દાઓને ઉકેલવા માટે કામ કરશે.

આ પણ વાંચો - મંદિરે દર્શન કર્યા બાદ ગૃહરાજ્યમંત્રી હર્ષ સંઘવીએ માણી વડાપાઉની મેજબાની