કાર્યવાહીથી બચવા મધુ શ્રીવાસ્તવનો ટેક્નિકલ બચાવ ? ગોળી મારવાની નહીં ગોળી ખવડાવવાની વાત કરી હતી

હમેંશા કોઇને કોઇ કારણોસર વિવાદોમાં રહેતા અને વાઘોડિયા બેઠક પર ભાજપે ટિકીટ ન આપતા અપક્ષ ઉમેદવાર તરીકે ચૂંટણી લડનાર મધુ   શ્રીવાસ્તવે ફરીએકવાર પોતાના નિવેદન પર યૂ-ટર્ન માર્યો છે. મધુ  શ્રીવાસ્તવે તાજેતરમાં જે તેમના કાર્યકરોને સંબોધતા કહ્યું હતું કે કોઇ તમારો કોલર પકડે તો તેના ઘરે જઇ ગોળી મારીશ .તેમના આ નિવેદન બાદ ખાસ્સો વિવાદ થયો હતો.. એટલે સુધી કે ખુદ ચૂંટણી પંચ પણ તેમના આ નિવેદન સામે એક્શનમાં આવી ગયું અને તેમની સામે સુઓમોટો દાખલ કર્યો છે.. 

જો કે આ અંગે જ્યારે ગુજરાત ફર્સ્ટે મધુ શ્રીવાસ્તવ પર સવાલોની ઝડી વરસાવી તો મધુશ્રી વાસ્તવ તુરંત બચાવની મુ્દ્રામાં આવી ગયા. મધુશ્રી વાસ્તવને જયારે ગુજરાત ફર્સ્ટના પ્રતિનિધિ દ્વારા સવાલ કરાયો કે શું આ રીતે ગોળી મારવાની વાત કરીને તમે જનતા પાસેથી મત માંગશો ત્યારે મધુ શ્રીવાસ્તવે કહ્યું કે મેં ગોળી મારવાની નહીં પરંતુ ગોળી ખવડાવવાની વાત કરી છે. 

મધુ શ્રીવાસ્તવે કહ્યું કે તમને શું ખબર મેં કઇ ગોળીની વાત કરી છે  દવાની ગોળીની વાત કરી છે કે ચોકલેટની ગોળીની વાત કરી છે.. આમ મધુ શ્રીવાસ્તવે ટેક્નિકલી પોતાનો બચાવ કરવાનો પ્રયાસ કર્યો હતો.. હવે જોવાનું એ રહેશે કે ચૂંટણીપંચની કાર્યવાહીથી બચવા મધુ શ્રીવાસ્તવે પીવડાવેલી આ ગોળીને  ચૂંટણી પંચ કેટલી સાચી માને છે. 

આ પણ વાંચો  -  રાપરમાં કોંગ્રેસ ઉમેદવારના ગુમ થવાના ઠેર ઠેર બેનરો લગાડવામાં આવ્યા