હાર્દિક પટેલે એક સમયે ભાજપને કોસવામાં કશું બાકી નહોતું રાખ્યું. પરંતુ આજે કર્યા ભાજપના આવા વખાણ..

આખરે હાર્દિક પટેલ હવે ભાજપના થઇ ચૂક્યા છે. પાટીદાર આંદોલન થકી દેશભરમાં જાણીતા થયેલા હાર્દિક પટેલે એક સમયે ભાજપને કોસવામાં કશું બાકી નહોતું રાખ્યું. પરંતુ આજે તેમણે ભાજપના વખાણ કરવામાં પણ કોઇ કસર ન છોડી. પત્રકારોના તીખા સવાલોના જવાબ આપતા હાર્દિક પટેલ પોતાના મિજાજ પર કંટ્રોલ નહોતા રાખી શક્યા. જો કે પત્રકારોએ હાર્દિકની વર્તણુંકને લઇને સખત વાંધો ઉઠાવતા હાર્દિક નરમ પડ્યા હતા. 

પાટીદાર અનામત આંદોલનનું નેતૃત્વ કરનાર હાર્દિક પટેલે ભારતીય જનતા પાર્ટીનો ખેસ પહેરી લીધો છે. બીજેપીના પ્રદેશ અધ્યક્ષ સી.આર. પાટીલે હાર્દિક પટેલને ખેસ પહેરાવીને પાર્ટીમાં આવકાર્યા હતા. આ પ્રસંગે પૂર્વ નાયબ મુખ્યમંત્રી નીતિન પટેલ પણ હાજર રહ્યા હતા. નીતિન પટેલે હાર્દિકને ટોપી પહેરીવી હતી. હાર્દિકના બીજેપી પ્રવેશ દરમિયાન રાજ્યના મુખ્યમંત્રી ભૂપેન્દ્ર પટેલ હાજર રહ્યા ન હતા. આ ઉપરાંત કેન્દ્રમાંથી કોઈ મોટા નેતાઓ પણ હાજર રહ્યા ન હતા. હાર્દિક પટેલે બીજેપીન ખેસ પહેર્યા બાદ મીડિયા સાથે વાતચીત કરી હતી.

હાર્દિક પટેલની પ્રેસ-કોન્ફરન્સ દરમ્યાન હાર્દિકના તેવરને લઇને પત્રકારોએ સખત વાંધો ઉઠાવ્યો હતો. જે બાદ હાર્દિક પટેલે સમય પારખીને શાંતિથી પત્રકારોના સવાલનો જવાબ આપવા પ્રયાસ કર્યો હતો. સમગ્ર પ્રેસ કોન્ફરન્સ દરમ્યાન હાર્દિક પટેલ ખુદનો બચાવ કરતા નજરે પડ્યા હતા.