ક્યાંક મતદાન મથક પર કેક કપાઈ તો, ક્યાંક બળદ ગાડામાં લોકો આવ્યા મતદાન કરવા, જાણો મતદારોમાં કેવો છે ઉત્સાહ

ગુજરાત વિધાનસભાની ચૂંટણીના (Gujrat Elections 2022) પ્રથમ તબક્કાનું મતદાન ચાલી રહ્યું છે નાની મોટી ઘટનાઓ બાદ કરતા ક્યાંક કોઈ અનિચ્છનિય બનાવ બન્યો નથી. લોકો ઉત્સાહભેર મતદાન કરવા માટે મતદાન મથકે પહોંચી રહ્યાં છે ત્યારે અનેક એવા મતદાન મથકોમાં લોકશાહીના આ પર્વની ઉજવણીને લઈને વિવિધતા જોવા મળી હતી.

જૂનાગઢ (Junagadh) વિધાનસભા બેઠકના માખીયાળા ગામે એનિમલ બુથ ઉભું કરવામાં આવ્યું છે. દેશમાં સૌપ્રથમ વખત ચૂંટણી દરમિયાન એનિમલ બુથ કાર્યરત કરાયું હોય તેવું બન્યું છે. ગ્રામ્ય પંથકના મતદારો મતદાન સાથે પોતાના પશુઓને સારવાર અને રસીકરણ કરાવી શકે તેવા હેતુથી મતદારોમાં જાગૃતિ આવે તે માટે જીલ્લા વહીવટી તંત્ર દ્વારા અનોખો પ્રયોગ કરાયો છે. જેમાં મતદાન કરવા આવતાં મતદારો એનિમલ બુથ પર પોતાના પશુઓને સાથે લાવી તેની સારવાર, રસીકરણ નિઃશુલ્ક કરાવી શકે છે. તંત્રના આ નિર્ણયથી પશુપાલકોમાં ખુશીનો માહોલ જોવા મળ્યો હતો અને આશરે 130થી વધુ પશુઓની નિઃશુલ્ક સારવાર રસીકરણ કરવામાં આવી હોવાનું જાણવા મળ્યું છે.

જેતપુર (Jetpur) વિધાનસભામાં વહેલી સવારથી જ મતદારોમાં ઉત્સાહ દેખાઈ રહ્યો છે ત્યારે જેતપુરના નવાગઢમાં યુવકે અનોખી રીતે લોકશાહીનું મહાપર્વની ઉજવણી કરી હતી. અહીં વિનીત ઠુમર નામના યુવકે આજે પહેલું મતદાન તેમજ તેમના બર્થ-ડેની અનોખી રીતે ઉજવણી કરી હતી. યુવકે પોલિંગ બૂથ ઉપર રોકાયેલા કર્મચારીઓ સાથે કેક કટીંગ કરી લોકશાહીનું મહાપર્વની ઉજવણી કરી હતી.

અમરેલી (Amreli) જિલ્લાના સાવરકુંડલા તાલુકાના આંબરડી ખાતે બળદ ગાડામાં ખેડૂતો મતદાન કરવા નીકળ્યા હતી. બળદ ગાડામાં ખેડૂતો 'જય જવાન, જય કિસાન'ના નારાઓ સાથે મતદાન મથકે પહોંચ્યા હતા.  ખેડૂત નેતા મહેશ ચોડવડીયા સહપરિવાર બળદ ગાડામાં મતદાન મથકે પહોચ્યા હતા.

સુરેન્દ્રનગર (Surenrdanagar) જિલ્લાની વઢવાણ વિધાનસભા બેઠક માટે વરરાજાએ લગ્નના દિવસે મત આપી પોતાના મતાધિકારનો ઉપયોગ કર્યો હતો. લીંબડી પરશુરામ ધામ ખાતેથી માંડવાની વિધિ પૂર્ણ કરી જાન પ્રસ્થાન થાય તે પહેલાં વઢવાણ કોમર્સ કોલેજ ખાતે વરરાજા યુવક સોહમ દવેએ પરિવાર સાથે મતદાન કર્યું હતું. લગ્ન પહેલા મતદાનની ફરજ નિભાવી અનોખું ઉદાહરણ પૂરું પાડ્યું હતું.

બોટાદના (Botad) મંગળપરા વિસ્તારમાં  વરરાજાએ વિનાયક મિયાણી નામના વરરાજાએ મતદાન કર્યું હતું. મતદાન મથકે ઢોલ નગારા સાથે પોતાના પરિવાર અને મિત્રો અને પડોસીઓ સાથે મતદાન કરવા પહોંચ્યા હતા અને તેમણે અન્ય લોકોને પણ કરી મતદાન કરવાની અપીલ કરી હતી.

તો બીજી તરફ બોટાદમાં દુલ્હને મતદાન  કર્યું હતું. કૃપાબા ધાધલએ પ્રભુતામાં પગલાં પાડતાં પહેલા મતદાન કર્યું. લગ્ન પહેલાં સૌપ્રથમ વખત મતદાન કરતા શબ્દોમાં વર્ણવી ન શકાય તેવી ખુશી હોવાનું જણાવ્યું.

મોરબીના (Morbi) મહેન્દ્રનગરમાં સદી વટાવી ચૂકેલા કેશરબેને મતદાન કર્યું. 100 વર્ષના કેશરબેન અને તેમના દિવ્યાંગ પુત્રી  છબીબેન મેરજાએ વ્હીલચેરમાં આવી મતદાન કર્યું. મતદાન કરતા સમયે કેશરબેને કહ્યું, ભાઈ જો મારે સો વરહ પુરા થઈ ગયા તોય મત દેવા આવું છું. દિવ્યાંગ પુત્રી છબીબેન મેરજાએ પણ કહ્યું કે, તકલીફ હોય તો શું થયું મતદાન તો કરવું જ જોઈએ.

સુરતના (Surat) રાંદેર વિસ્તારની શાળાના મતદાન મથક પર એક ચાર વર્ષનો બાળક આકર્ષણનું કેન્દ્ર બન્યો. આર્મીના કપડામાં સ્વયમ પટેલ નામનો બાળક આર્મી જવાનો સાથે સુરક્ષામાં જોડાયો. સ્વયમે આર્મીમાં જોડાવાની ઈચ્છા વ્યક્ત કરી તો સાથે જ મતદાન જાગૃતિ અંગે નો મેસેજ પણ આપી રહ્યો છે.

આ પણ વાંચો - અઢી વર્ષના બાળકને સાથે રાખી ચૂંટણીની ફરજ બજાવતી કોન્સ્ટેબલ