46 કેન્દ્રીય નેતાઓ, 36 સ્થાનિક નેતાઓ ગજવશે સભાઓ, પહેલા તબક્કા માટે ભાજપ કરશે ઝંઝાવાતી પ્રચાર

ગુજરાત વિધાનસભાની ચૂંટણીના નગારે ઘા વાગી ચુક્યા છે. મોટાભાગની સીટો પર રાજકિય પાર્ટીઓના ઉમેદવારો જાહેર થઈ ચુક્યા છે. રાજ્યમાં બે તબક્કામાં ચૂંટણી યોજાવાની છે જેમાં પહેલા તબક્કામાં 89 બેઠકોમાં મતદાન થવાનું છે. આવતીકાલથી ભાજપ વિધાનસભાની ચૂંટણીના શ્રીગણેશ કરવાનું છે.

આમ તો ભાજપે ઘણા સમય પહેલેથી જ ચૂંટણીનો પ્રચાર અને તૈયારીઓ શરૂ કરી દીધી છે પરંતુ તે પાર્ટીનો પ્રચાર હતો હવે આવતીકાલથી જે પ્રચાર શરૂ થવાનો છે તે ઉમેદવારો માટેનો પ્રચાર શરૂ થશે. સ્થાનિક ઉમેદવારોના પ્રચાર માટે ભાજપના કેન્દ્રીય અને પ્રદેશના દિગ્ગજ નેતાઓ આવશે. આવતીકાલથી ભાજપ ચૂંટણી પ્રચારના શ્રી ગણેશ કરશે. જેમાં પહેલા તબક્કાની સીટો માટે અલગ અલગ સ્થળો કેન્દ્રીય અને પ્રદેશના નેતાઓ આવી ચૂંટણી પ્રચાર કરશે અને ચૂંટણી પહેલા ભાજપ તરફી વાતાવરણ ઉભુ કરવાનો પ્રયાસ કરાશે.

લોકશાહીના મહાપર્વના પહેલા તબક્કામાં 89 બેઠકો પૈકી 82 બેઠકો ઉપર ભાજપના ઉમેદવારોના સમર્થનમાં રાષ્ટ્રીય સંગઠન, કેન્દ્રિય મંત્રી મંડળ તેમજ ભાજપા શાસીત રાજ્યોના મુખ્યમંત્રીશ્રીઓ અને નાયબ મુખ્યમંત્રીશ્રીઓ, દેશના વિવિધ લોકસભા ક્ષેત્રના સાંસદો મળી કુલ 15 મહાનુભાવો 46 વિધાનસભા ક્ષેત્રમાં અને પ્રદેશ અધ્યક્ષ શ્રી સી. આર. પાટીલ, રાજય સરકારના મુખ્યમંત્રીશ્રી, મંત્રીશ્રીઓ, પૂર્વ મુખ્યમંત્રીશ્રી, પૂર્વ નાયબ મુખ્યમંત્રીશ્રી, પૂર્વ કેબીનેટ મંત્રીશ્રીઓ રાજ્યના સાંસદો તેમજ સંઠનના હોદેદારો મળી કુલ 14 મહાનુભાવો 36 વિધાનસભા વિસ્તારમાં પ્રચાર-પ્રસાર અને વિશાળ જનસભાને સંબોધન કરશે. 

ભાજપ મીડિયા સેન્ટર ખાતેથી ભાજપ પ્રદેશ અધ્યક્ષશ્રી સી.આર.પાટીલે એક પત્રકાર પરિષદ યોજી હતી. જેમાં તેમણે જણાવ્યું હતું કે, આવતીકાલથી ભારતીય જનતા પાર્ટીના પ્રચારને લઈને સંપૂર્ણ વિગતો આપી હતી અને આ સાથે જ તેમણે જણાવ્યું કે, ભાજપના ઉમેદવારોના સમર્થનમાં પ્રચાર પ્રસાર અને જનસભા સંબોધનાર મહાનુભાવો દેશ અને વિવિધ રાજ્યોમાં કાર્યરત બિન ભાજપા સરકારોનું વાસ્તવિક ચિત્ર ઉજાગર કરશે. મહાનુભાવોના આ પ્રચાર પ્રસાર થકી રાજ્યમાં રેકોર્ડ બ્રેક સીટો સાથે અને રેકોર્ડ બ્રેક લીડ સાથે ભાજપાનો પ્રચંડ વિજય થશે તેવો આશાવાદ વ્યક્ત કર્યો હતો.

આ પણ વાંચો - દહેગામની ટિકિટ 1 કરોડમાં વેચાઇ, કામિનીબાનો ગંભીર આરોપ