ભાજપે વધુ 3 ઉમેદવારોની યાદી કરી જાહેર, આ બેઠક પર ઉમેદવારના નામની જાહેરાત બાકી

ગુજરાત વિધાનસભાની ચૂંટણીના રણસંગ્રામમાં રાજકિય પાર્ટીઓ પોતાના યોદ્ધાઓને ચૂંટણીના રણ મેદાનમાં ઉતારી રહી છે. મોટા ભાગની વિધાનસભા સીટો પર ભાજપ, કોંગ્રેસ અને આમ આદમી પાર્ટીએ પોતાના મોટા ભાગના ઉમેદવારોના નામ જાહેર કરી દીધાં છે. વિધાનસભાની 4 સીટો પર ભાજપે પોતાના ઉમેદવારોના નામ જાહેર કર્યાં નહોતા જે પૈકીના 3 ઉમેદવારોના નામ ભાજપે જાહેર કરી દીધાં છે. ભાજપે અત્યાર સુધીમાં કુલ 181 ઉમેદવારોના નામ જાહેર કરી દીધાં છે. હવે માત્ર માંજલપુર બેઠક પર ભાજપના ઉમેદવારના નામની જાહેરાત બાકી છે.

આવનારી ગુજરાત વિધાનસભાની ચૂંટણી માટે આજે ગુજરાતના મુખ્યમંત્રીશ્રી ભૂપેન્દ્રભાઇ પટેલે ઉમેદવારી પત્ર ભર્યુ. મુખ્યમંત્રીશ્રીએ અમદાવાદની ઘાટલોડિયા વિધાનસભા બેઠક પરથી ઉમેદવારી નોંધાવી છે. કેન્દ્રીય ગૃહમંત્રી અમિત શાહની ઉપસ્થિતિમાં શ્રીભૂપેન્દ્રભાઇએ વિધાનસભા ચૂંટણી માટે ઉમેદવારી નોંધાવી. આ પહેલા બન્ને નેતાઓ દ્વારા વિશાળ રોડ શો કરવામાં આવ્યો હતો. જેમાં વિશાળ જનમેદની ઉમટી હતી.

આ અગાઉ ગુજરાત વિધાનસભાની ચૂંટણી ( (Gujarat Assembly Election)) માટે ભાજપે 12 ઉમેદવારોના નામ જાહેર કર્યા હતા. અત્યાર સુધીમાં ભાજપે 16 મહિલાઓને ટિકિટ આપી છે. ગુજરાતમાં વિધાનસભાની ચૂંટણી બે તબક્કામાં 1 ડિસેમ્બર અને 5 ડિસેમ્બરે યોજાવાની છે. પરિણામ 8મી ડિસેમ્બરે આવશે. પ્રથમ રાઉન્ડમાં કુલ 182 વિધાનસભા બેઠકોમાંથી 89 બેઠકો પર મતદાન થશે અને મુખ્ય રાજકીય પક્ષોએ લગભગ આ તમામ બેઠકો માટે તેમના ઉમેદવારો જાહેર કરી દીધા છે.

આ પણ વાંચો - મુખ્યમંત્રી ભૂપેન્દ્રભાઇ પટેલે કેન્દ્રીય ગૃહમંત્રી અમિતભાઇ શાહની ઉપસ્થિતિમાં ભર્યુ ઉમેદવારી પત્ર