ગુજરાત વિધાનસભાની ચૂંટણી માટે ભાજપે પ્રથમ યાદી કરી જાહેર, જાણો કોને મળી ટિકિટ

ભાજપ તરફથી પ્રદ્યુમનસિંહ જાડેજા (અબડાસા), કુવરજી બાવડીયા (જસદણ), જવાહર ચાવડા (માણવદર), હર્ષદ રીબડીયા (વિસાવદર), ભગા બારડ (તાલાલા), અશ્વિન કોટવાલ (ખેડબ્રહ્મા), જીતુ ચૌધરી (કપરાડા)ને ટિકિટ આપવામાં આવી છે. આ તમામ નેતાઓ કોંગ્રેસમાંથી ભાજપમાં જોડાયા છે.

રાજ્યમાં વિધાનસભાની ચૂંટણી માટે ભાજપે આજે તેના ઉમેદવારોની પ્રથમ યાદી જાહેર કરી દીઘી છે. આ વર્ષે ગત વખતની યાદીમાંથી 84 નામ કપાયા છે. જ્યારે 160ની યાદીમાં 69 ઉમેદવારને રિપીટ કરાયા છે. 160 ઉમેદવારો પૈકી 14 મહિલા ઉમેદવારને ઉતારવામાં આવ્યા છે. આ 160 ની યાદીમાં 4 ડૉક્ટર, 4 PHD ને ભાજપે ઉમેદવાર તરીકે ઉતાર્યાં છે. હજુ 22 નામ જાહેર કરવાના બાકી છે. 

ક્રિકેટર રવિન્દ્ર જાડેજાની પત્ની રિવાબા જાડેજાને જામનગર ઉત્તર બેઠક પરથી ટિકિટ આપવામાં આવી છે. ત્રણ વર્ષ પહેલા તેઓ ભાજપમાં જોડાયા હતા. ભાજપે 160 બેઠકો માટે ઉમેદવારોની જાહેરાત કરી છે. ગુજરાત વિધાનસભામાં કુલ 182 વિધાનસભા બેઠકો છે. ગુજરાતમાં બે તબક્કામાં ચૂંટણી યોજાવાની છે. પ્રથમ તબક્કાની ચૂંટણી 1 ડિસેમ્બરે અને બીજા તબક્કાની ચૂંટણી 5 ડિસેમ્બરે યોજાશે. રાજ્યમાં પ્રથમ તબક્કામાં 89 બેઠકો પર મતદાન થશે જ્યારે બાકીની 93 બેઠકો પર બીજા તબક્કામાં મતદાન થવાનું છે.