પાલનપુર બેઠક પર ભાજપ અને કોંગ્રેસે પાંચ-પાંચ વખત જીત મેળવી છે, જાણો આ બેઠકનો ચૂંટણીલક્ષી ઇતિહાસ

બનાસકાંઠા જિલ્લાની પાલનપુર બેઠક ચૂંટણીની દૃષ્ટિએ ઘણી મહત્વની છે. અહીં ભાજપ અને કોંગ્રેસ વચ્ચે ગાઢ મુકાબલો રહ્યો છે. છેલ્લી બે ચૂંટણીઓથી અહીં કોંગ્રેસની જીત થઈ રહી છે. અગાઉ સતત પાંચ ચૂંટણીમાં આ બેઠક પર ભાજપને સફળતા મળી છે. આ વખતે કોંગ્રેસે પોતાના વર્તમાન ધારાસભ્ય મહેશ પટેલને ટિકિટ આપી છે. જ્યારે આ બેઠક પર ભાજપે અનિકેત ઠાકરને મેદાનમાં ઉતાર્યા છે. આમ આદમી પાર્ટી તરફથી રમેશ નાભાણી મેદાનમાં છે.

  

2017ની વિધાનસભા ચૂંટણીમાં કોંગ્રેસે સતત બીજી વખત આ સીટ જીતી હતી. કોંગ્રેસના મહેશકુમાર પટેલે ભાજપના લાલજીભાઈ પ્રજાપતિને 17,000 મતોની સરસાઈથી હરાવ્યા હતા. આ ચૂંટણીમાં કુલ 14 ઉમેદવારો મેદાનમાં હતા જેમાંથી 12 ઉમેદવારોની ડિપોઝીટ જપ્ત થઈ હતી. અગાઉ 2012માં પણ કોંગ્રેસના મહેશ પટેલ અહીંથી જીત્યા હતા. આ બેઠક પર અત્યાર સુધી યોજાયેલી કુલ 13 ચૂંટણીઓમાંથી કોંગ્રેસ અને ભાજપે પાંચ-પાંચ વખત જીત મેળવી છે. આ સાથે જ ત્રણ વખત વિજય અન્યના ખાતામાં ગયો છે. આ સીટ પર બીજા તબક્કામાં 5 ડિસેમ્બરે મતદાન થશે. પરિણામ 8 ડિસેમ્બરે આવશે.

પાલનપુર બેઠક બનાસકાંઠા જિલ્લાની 9 બેઠકોમાંથી એક છે. 2017માં કોંગ્રેસે જિલ્લામાં 9માંથી 5 બેઠકો જીતી હતી. આ સાથે જ ભાજપ 4  બેઠકો જીતવામાં સફળ રહ્યો હતો.

આ પણ વાંચો  -  દેવગઢ બારીયામાં AAPને ઝટકો, 40 કાર્યકરો BJPમાં જોડાયા