વડોદરામાં RSSના પ્રવાસ દરમિયાન નરેન્દ્રભાઈ મોદીને હીરા બાના હાથે બનેલું ભોજન યાદ આવે તો તેઓ આ ઘરે જમતા

દેશના યશસ્વી વડાપ્રધાન નરેન્દ્ર મોદીએ પોતાના માથેથી માતૃ છાયા ગુમાવી છે. હીરાબાનું અવસાન થતાં સમગ્ર દેશ શોકમય બન્યો છે. વડાપ્રધાન નરેન્દ્ર મોદી માતા હીરાબાના ખૂબ નિકટ હતા એ સૌ કોઈ જાણે છે. પરંતુ શું તમે એ જાણો છો કે જ્યારે વડાપ્રધાન સંઘ પ્રવાસે નીકળતા ત્યારે જો હીરા બાના હાથે બનેલું ભોજન યાદ આવે તો તેઓ ક્યા જતા?

વર્ષ 1986ની આ વાત છે વડાપ્રધાન નરેન્દ્ર મોદી સંઘના કામે અવાર-નવાર વડોદરા આવતા અને એમના કાર્યકાળનો મોટાભાગનો સમય વડોદરામાં જ વીત્યો એમ કહો તો પણ ચાલે, નરેન્દ્ર મોદી શરૂઆતથી જ હીરા બાના હાથે બનેલું સાદુ ભોજન જમવા ટેવાયેલા, જ્યારે તેઓ પ્રવાસે નીકળતા હીરાબાને અવશ્ય યાદ કરતા. વડોદરા ખાતે તેઓ અઠવાડિયામાં ત્રણ ચાર દિવસ ચોક્કસ આવતા અને સંઘના કાર્યકરો સાથે આત્મીયતા વધે તે માટે પારિવારિક સબંધો કેળવતા, સાથે રહેતા અને જમતાં પણ ખરા.

જમનાદાસ ઉકામલમોતી રામાણી તેઓ વર્ષ 1986 વખતે RSS વડોદરા મહાનગરના ખજાનચી હતા. વર્ષો સુધી સંઘ સાથે સંકળાયેલા જમના દાસ હાલના વડાપ્રધાન અને તત્કાલીન સમયના સંઘ કાર્યકર નરેન્દ્ર મોદીના ખૂબ નિકટ હતા. નરેન્દ્ર ભાઇ મોદી વડોદરા આવે ને જમનાદાસજીના ઘરે ન ગયા હોય એવું ક્યારેય બન્યું નથી.

નરેન્દ્ર ભાઇ મોદીને કાકા તરીકે બોલાવતા જમનાદાસજીના પુત્રી પૂનમ બેને ગુજરાત ફર્સ્ટ સાથેની ખાસ વાતચીતમાં જણાવ્યું હતું કે, નરેન્દ્ર કાકાને હિરા બા સાથે આત્મીયતા ખૂબ હતી. તેઓ હિરા બાના હાથનું સાદુ ભોજન ખાવાથી ટેવાયેલા હતા. સંઘના કામે મહિનાઓ સુધી તેમના બહાર ગામ ફરવા નું થતું. આમ તો તેઓ જ્યાં જતા ત્યાં સાદુ જ ભોજન જમતાં પરંતુ જ્યારે પણ હિરા બાના હાથનું ભોજન યાદ આવે વડોદરા દોડી આવતા અને કહેતા આજે બાના હાથના ભોજનની ખૂબ યાદ આવે છે. મારા માટે પાલકની ભાજી અને ખીચડી બનાવજો. નરેન્દ્ર ભાઇ જ્યારે તેમના બા પાસે જતા હિરા બાને પાલકની ભાજી અને ખીચડી બનાવવાનો આગ્રહ કરતા ત્યારે અમારા ઘરે પણ તેઓ આજ ભોજન બનાવડાવતા. અમે તમામ પરિવારના સભ્યો અને મોદી કાકા સાથે જમવા બેસતા જમતાં જમતાં હિરા બાને યાદ કરતા, પાલકની ભાજી અને ખીચડી ખાઈને કહેતા આજે બઉ દિવસો પછી બાના હાથનો સ્વાદ ચાખ્યો.

આ પણ વાંચો - PM MODIએ માતાને આપી મુખાગ્ની, થયા ભાવુક