ગીર ગઢડાના આ ગામમાં બેંકનું એટીએમ નથી પરંતુ પીવાના પાણીનું એટીએમ છે

ગીરગઢડા તાલુકાનું નાનુ એવુ ગામ બેડીયા ગીર જંગલની બોર્ડર નજીક આવેલું છે અને આ ગામની વસ્તી 2500 ની અંદાજીત છે. આ બેડીયા ગામમાં લગભગ સિંહોની લટાર પણ સામાન્ય છે.  ગામમાં આજે પણ લોકો પાણીના એટીએમમાં પૈસા નાખી પાણી ભરે છે. ગામમાં બેંકનું એટીએમ નથી પણ પાણીનું એટીએમ છે..

ગામના સરપંચ સુરેશભાઇ હડિયાએ જણાવ્યું કે બે માસ પહેલા સરકારની ગ્રાન્ટમાંથી ગામમાં લોકોને ફિલ્ટરવાળુ ઠંડુ પાણી મળી રહે તે માટે પાણીનું એટીએમ મૂકવામાં આવ્યું અને આ પાણીના એટીએમમાં રૂ. ૫ નો સિક્કો નાખવાથી 10 લીટર શુદ્ધ ઠંડુ પાણી લોકોને મળી રહે છે. હવે લોકો આ એટીએમમાં પાણી ભરવા આવે છે. તે સિવાય ગામને હરિયાળુ બનાવવાનો સંકલ્પ પણ ગ્રામજનો એ કર્યો છે અને  350 થી વધુ વૃક્ષો ગામોમાં વાવેલા છે. અને આ વૃક્ષોને ટપક પદ્ધતિથી રોજ પાણી પાવામાં આવે છે.એટીએમમાં ફિલ્ટરવાળુ પાણી ભરાય ત્યારે 30 ટકા પાણી વેસ્ટેજ જતું હોય આ વેસ્ટેજ પાણીનો ઉપયોગ અને ટપક પદ્ધતિ દ્વારા વૃક્ષોના ઉછેર માટે કર્યા છે.

 ગ્રામજનોના સહિયારા પ્રયાસથી બેડિયા ગામને આદર્શ ગામ ગામ બનાવાના પ્રયાસો શરુ કરાયા છે.  નજીકના ભવિષ્યમાં પંચાયત ઓફિસ પણ સોલારયુક્ત કરવામાં આવશે.  પાણીની સમસ્યા નિવારવા માટે આગામી સમયમાં તળાવ બનાવાનું પણ આયોજન કરાયું છે. બેડીયા ગામમાં 1 વર્ષમાં વિકાસના 13 કામ કરાયા છે અને આગામી 1 વર્ષમાં વિકાસના 14 કામો કરવામાં આવશે. તે સિવાય ગામમાં હાલ 11 સીસી ટીવી કાર્યરત છે અને હજુ 36 સીસીટીવી લગાડવા માટેનું આયોજન છે.જેથી ગામમાં સિંહની રોજીંદી અવર જવર પર નજર રહેશે.

આ પણ વાંચો---અમદાવાદના પીરાણા-પીપળજ રોડ પર ફેક્ટરીમાં લાગી ભીષણ આગ