સુરત શહેરના મહિધરપુરા વિસ્તારમાં બાળકીનું અપહરણ, આ કારણે કર્યું હતું અપહરણ

સુરત શહેરના મહિધરપુરા વિસ્તારમાં બાળકીના અપહરણની ઘટના સામે આવી હતી. જે ઘટનામાં ક્રાઈમબ્રાન્ચને સફળતા મળી છે. ક્રાઈમ બ્રાન્ચે અપહરણ કર્તાની ચુંગાલમાંથી બાળકીને સહીસલામત છોડાવી માતાપિતાને સોંપી હતી. સ્માર્ટ સિટી, સિલ્ક સિટી, ડાયમંડ સિટી જેવા હુલામણા નામથી સુરત જાણીતુ છે પરંતુ હવે ધીમે ધીમે સુરત ક્રાઈમ સિટી બની રહ્યું છે. સુરત શહેર હવે ક્રાઈમ સિટીના નામથી જાણીતુ બની રહ્યું છે. કારણ કે શહેરમાં ધીમે ધીમે ક્રાઈમ રેશિયોમાં વધારો થઈ રહ્યો છે.

સુરત શહેરમાં હાલ એક એવી ઘટના પ્રકાશમાં આવી છે. જેમાં એક નાની બાળકીનું અપહરણ કરવામાં આવ્યું હતું. ત્રણ વર્ષની બાળકીનું અપહરણ કરી બાળકીને લઈ અપહરણકર્તા ફરાર થઈ ગઈ હતી. પરંતુ આ સમગ્ર ઘટના CCTVમાં કેદ થતાં પોલીસે ઘટના અંગે તપાસ હાથ ધરી હતી. પોલીસ તપાસમાં આ બાળકીનું અપહરણ ફૂટપાથ પર રહેતી કોઈ મહિલા દ્વારા અપહરણ કરવામાં આવ્યું હોવાનું દેખાઈ આવતા પોલીસે આ દિશામાં તપાસ હાથ ધરી હતી.

પોલીસને આ ઘટનાની જાણકારી મળતાની સાથે તપાસ શરૂ કરી હતી. જો કે આ તપાસમાં પાછળથી ક્રાઈમ બ્રાન્ચ પણ જોડાઈ હતી. બાળકીનું અપહરણ 21 જાન્યુઆરીના રોજ કરવામાં આવ્યું હતું. પરંતુ આરોપી પાસે મોબાઈલ ન હોવાને કારણે પોલીસ માટે આરોપીને શોધખોળ કરવી મુશ્કેલ હતી. પોલીસે આરોપીને શોધવા માટે અલગ અલગ ટીમો બનાવી તપાસ શરૂ કરી હતી. પોલીસે હ્યુમન સર્વેલન્સના આધારે તપાસ કરીને બાળકીને શોધી કાઢી હતી.

સુરત ક્રાઈમ બ્રાન્ચ દ્વારા બાળકીની શોધખોળ માટે બનાવવામાં આવેલી ટીમો દ્વારા બાળકીની શોધ કરી લેવામાં આવી હતી. બાળકી જોળવા પાટીયા પાસેથી અપહરણ કર્તાની ચુંગાલમાંથી છોડાવી લેવામાં આવી. આ બાળકીને રોજ રમાડવા આવતી રીટા ઉર્ફે રેખા નામની મહિલા દ્વારા જ અપહરણ કરવામાં આવ્યું હતું. રેખા અને એના પતિ મનિષ સાથે મળીને અપહરણ કર્યું હતું.

રેખાની પૂછતાછ કરવામાં આવી ત્યારે પોલીસને માહિતી મળી કે રેખાને સાત મહિનાના ગર્ભનું ગર્ભપાત થયું હતું ત્યાર બાદ તે માતા ન બની શકતાં તેણીએ બાળકીનું અપહરણ કર્યું હતું. સુરત શહેર ક્રાઈમ બ્રાન્ચ દ્વારા બાળકીને અપહરણ કરનારની ચુંગાલમાંથી છોડાવવા માટે સરાહનીય કામગીરી કરવામાં આવી છે ત્યારે બાળકીને છોડાવીને પોલીસે માનવતાનો અભિગમ દાખવ્યો છે.

આ પણ વાંચો - રાજ્યમાં આગામી બે દિવસ પડશે હાડ થીડવતી ઠંડી, તંત્રએ સુચનો જાહેર કર્યાં, તો અંબાલાલે કહી આ વાત, જાણો