ક્ષમતા કરતા વધારે ભીડ થતાં મોરબીનો ઝૂલતો પુલ તૂટ્યો, મુખ્યમંત્રીશ્રીએ રૂબરૂ ઘટના સ્થળે સમિક્ષા કરી

મોરબીમાં બેસતા વર્ષના દિવસે ખુલ્લો મુકાયેલો ઝૂલતો પુલ તૂટ્યો છે. આ દુર્ઘટનાથી અનેક લોકો પાણીમાં પડ્યા હોવાની માહિતી સામે આવી રહી છે. આશરે 400થી વધારે લોકો પાણીમાં ખાબક્યા હોવાની માહિતી સામે આવી છે. મળતી વિગતો પ્રમામે વધારે પડતા લોકો પુલમાં એકઠાં થઈ જતાં આ પુલ તુટ્યો છે. મુચ્છુ હોનારત બાદ આ મોરબીની સૌથી મોટી દુર્ઘટના છે. દુર્ઘટનાને પગલે મચ્છુ હોનારતની યાદો તાજી થઈ છે. હાલ મોરબીમાં ભયાનક માહોલ છે.

ગુજરાત ફર્સ્ટ સાથેની વાતચીત દરમિયાન મંત્રીશ્રી બ્રિજેશ મેરજાએ 35 જેટલા લોકોના મોત થયાંની આશંકા વ્યક્ત કરી. 70 લોકોને બહાર કાઢવામાં આવી ચુક્યા છે. સાંજે 6.30 કલાકે આ દુર્ઘટના ઘટી હતી.

આ બચાવ કાર્યમાં 200થી વધારે લોકો 2 કલાકથી વધારે સમયથી મહેનત કરી રહ્યાં છે. મોરબીની દુર્ઘટના પર મુખ્યમંત્રીશ્રીએ સહાયની જાહેરાત કરી છે.

મોરબી ઝુલતા પુલ તૂટતા સર્જાયેલી દુર્ઘટનામાં જેમના પરિવારજનો ફસાયા હોય કે ગુમ  થયા હોય તેમની જાણકારીની જિલ્લા ડિઝાસ્ટર કન્ટ્રોલ રૂમના ટેલીફોન 02822-243300 પર માહિતી આપી પરિવારજનોને સહયોગ કરવા વિનંતી છે. જેથી રાહત બચાવવાની કામગીરી સુચારુ રૂપે પાર પાડી શકાય. જિલ્લા વહીવટી તંત્ર દ્વારા રાહત બચાવની કામગીરી યુદ્ધના ધોરણે ચાલી રહી છે. આપત્તી વ્યવસ્થાપનની કામગીરીમાં સમગ્ર જિલ્લા વહીવટી તંત્ર સતત ખડેપગે તૈનાત રહી કામગીરી કરી રહ્યું છે.

રેન્જ આઈજી અશોકકુમાર યાદવે ગુજરાત ફર્સ્ટ સાથેની વાતચીતમાં મુખ્યમંત્રીશ્રી પહેલા ઘટનાસ્થળે અને બાદમાં હોસ્પિટલ જશે તેમ જણાવ્યું હતું. તેમજ ઘટનાની નિષ્પક્ષ તપાસ કરી જવાબદારો સામે કાર્યવાહી કરવામાં આવશે તેમ જણાવ્યું હતું.

હાલ આ મામલે વધુ વિગતોની રાહ જોવાઈ રહી છે. અત્યાર સુધીમાં 35 લોકોને હોસ્પિટલ ખસેડવામાં આવી ચુક્યા છે. જણાવી દઈએ કે, મોરબી શહેર વચ્ચેથી મચ્છુ નદી પસાર થઈ રહી છે અને તેના પર આ પુલ બનેલો છે. દુર્ઘટનાને પગલે મોરબી સિવિલ હોસ્પિટલમાં મોટી સંખ્યામાં લોકો ભેગા થતાં સ્થિતિ પર કાબુ મેળવવા મોટી સંખ્યામાં પોલીસ કાફલો તૈનાત કરી દેવામાં આવ્યો છે. સિવિલ હોસ્પિટલ પોલીસ છાવણીમાં ફેરવાઈ છે. 

રાષ્ટ્રપતિશ્રી દ્રોપદી મુર્મૂએ ઘટના અંગે દુ:ખ વ્યક્ત કરતા ટ્વીટ કર્યું કે, ગુજરાતના મોરબીમાં થયેલી દુર્ઘટનાએ મને ચિંતામાં મૂકી છે. અસરગ્રસ્ત લોકો સામે મારી સંવેદના રાહત અને બચાવના પ્રયાસોથી પીડિતોને મદદ મળશે.

મુખ્યમંત્રીશ્રીએ પોતાનો પ્રવાસ ટુંકાવી ગાંધીનગર આવવા રવાના થયા છે. તેમણે ટ્વીટ કરીને જણાવ્યું કે, મોરબીની દુર્ઘટનાને પગલે માનનીય પ્રધાનમંત્રીશ્રી સાથેના આગળના કાર્યક્રમોને ટૂંકાવીને ગાંધીનગર પહોંચી રહ્યો છું. ગૃહ રાજ્યમંત્રીશ્રીને સ્થળ પર પહોંચી બચાવ કામગીરીનું માર્ગદર્શન કરવા જણાવ્યું છે. SDRF સહિતની ટૂકડીઓને બચાવ કામગીરી માટે મોબીલાઈઝ કરવામાં આવી છે.

વડાપ્રધાનશ્રી નરેન્દ્ર મોદીએ મુખ્યમંત્રીશ્રી ભુપેન્દ્ર પટેલ સાથે વાત કરી. તેમણે ઝડપી બચાવ કાર્ય અને સ્થિતિ પર નજર રાખવા અને અસરગ્રસ્તોને શક્ય તમામ મદદ પહોંચાડવા જણાવ્યું છે.

મુખ્યમંત્રીશ્રીએ ટ્વીટ કરી દુ:ખ વ્યક્ત કરતા કહ્યું કે, મોરબીમાં ઝૂલતો પુલ તૂટવાની દુર્ઘટનાથી અત્યંત વ્યથિત છું. તંત્ર દ્વારા રાહત અને બચાવની કામગીરી ચાલુ છે. ઇજાગ્રસ્તોને સત્વરે સારવારની વ્યવસ્થા માટે તંત્રને સૂચના આપી છે. આ સંદર્ભે જિલ્લાતંત્ર સાથે સતત સંપર્કમાં છું.

અન્ય એક ટ્વીટમાં તેમણે જણાવ્યું કે, મોરબીની દુર્ઘટના અંગે માનનીય પ્રધાનમંત્રી શ્રી નરેન્દ્રભાઇ મોદીએ મારી સાથે વાત કરી પરિસ્થિતિનો તાગ મેળવ્યો છે. પ્રધાનમંત્રીશ્રીએ સમગ્ર પરિસ્થિતિ પર સતત નજર રાખવા અંગે તથા તંત્રને બચાવ કામગીરી અંગે જરૂરી સૂચના અને માર્ગદર્શન આપ્યું છે.

મળતી વિગત મુજબ 250થી વધારે લોકો પુલ પર હતા અને બનાવને પગલે જેટલી એમ્બ્યુલન્સ હતી તે સ્થળ પર મોકલી દેવામાં આવી છે. બચાવ કાર્ય શરૂ કરી દેવામાં આવ્યું છે. કેપેસિટી કરતા વધારે લોકો ભેગા થઈ જતાં આ દુર્ઘટના ઘટી છે.

ફાયર વિભાગની ટીમ ઘટના સ્થળે પહોંચી છે તથા રાજકોટથી પણ એક ટીમ રવાના કરાઈ છે. આ પુલનો ઉપયોગ વિદ્યાર્થીઓ વધારે કરતા હોવાનું જાણવા મળ્યું છે. તંત્રની સાથે સ્થાનિક લોકો પણ બચાવ કાર્યમાં જોડાયા છે.

દુર્ઘટના પર દુ:ખ વ્યક્ત કરૂ છું. આ મોટી દુર્ઘટના છે. સરકાર કામે લાગી ગઈ છે. તંત્ર અને સ્થાનિક સેવાભાવી લોકો બચાવ કાર્યમાં જોડાય છે. ઓછામાં ઓછી કેઝ્યુલિટી થાય તે અનુસાર કામગીરી થઈ રહી છે. આ મામલે તપાસ થશે અને જવાબદાર સામે કામ કરવામાં આવશે પણ હાલ અસરગ્રસ્તોને સારવાર મળે તે મોટી પ્રાથમિકતા છે.

મોરબીનું વહીવટી તંત્ર ડુબ્યા છે તે લોકોને બચાવવા માટેની કામગીરી શરૂ કરી દીધી છે. હાલ બચાવ કાર્ય ચાલી રહ્યું છે. ઘટનાને પગલે અફરાતફરીનો માહોલ છે. રવિવારનો દિવસ હોવાથી અહીં મોટી સંખ્યા લોકો અહીં આવ્યા હતા. લોકો બચવા માટે પુલના દોરડા પકડી રાખતા જોવા મળ્યા હતા.

આ પણ વાંચો - સરકાર તમામ મદદ માટે તૈયાર છે, મોરબીની ઘટના પર ગૃહ રાજ્યમંત્રી હર્ષ સંઘવીનું નિવેદન