ગુજરાતમાં મોટાપાયે ઠગાઈની ચોંકાવનારી ઘટના બને તે પહેલા જ ATSએ પાર પાડ્યું ઓપરેશન

ગુજરાત ATSએ વધુ એક કાબિલે દાદ કામગીરી કરી છે. જેમાં નકલી સોના-ચાંદીના ઘરેણાઓ અને ચીલ્ડ્રન્સ બેન્કની નોટો થકી મોટાપાયે છેતરપિંડી (Fraud) આચરવાની પેરવીમાં રહેલી ટોળકીને દબોચી લઈ એક મોટો આર્થિક ગુન્હો થતો અટકાવ્યો છે. પોલીસ હંમેશા મોડી હોય છે તેવું મેણું હંમેશા પોલીસ વિભાગને માથે રહ્યું છે પણ આ મેણાંને ભાંગતી કામગીરી ગુજરાત ATS દ્વારા કરવામાં આવી છે.

ગુજરાત ATSના અધિકારીઓને એવી બાતમી મળી હતી કે નકલી સોના-ચાંદી અને નકલી તથા ચીલ્ડ્રન્સ બેન્કની નોટો થકી લોકો સાથે મોટા પ્રમાણમાં છેતરપીંડી થઈ રહી છે અને તેનો કારોબાર આણંદથી નવસારી સુધી ફેલાયેલો છે અને આ ટોળકી આગામી સમયમાં મોટા પ્રમાણમાં છેતરપિંડી આચરવાના છે. બાતમી બાદ ગુપ્ત રીતે તપાસમાં એવું જાણવા મળ્યું કે આ લોકો સુરતના અમરોલી ખાતેની તેમની ઓફીસમાં ભેગા થવાના છે. ગુજરાત ATSને મળેલી બાતમી બાદ સુરત SOGની ટીમને સાથે રાખી અમરોલી સુરત ખાતે રેઇડ કરી 6 શખ્સોને ઝડપ્યા હતા.

ટોળકી પાસેથી રૂ. 500 અને રૂ. 2000ના દરની 4 કરોડની નકલી નોટો તથા 50 નકલી ગોલ્ડ અને 10 નકલી સિલ્વરની લગડીઓ કબ્જે લીધી હતી.

આરોપીઓએ પ્રાથમીક પૂછપરછ દરમ્યાન જણાવ્યું હતું કે, તેઓ આ નોટોના બંડલો લોકોને અસલ ચલણી નોટો તરીકે આપી છેતરપીંડી કરવાની તથા મળી આવેલ ગોલ્ડ તથા સિલ્વરની લગડીઓ લોકોને વિડીયો કોલ કરીને અસલ સોનાના તથા અસલ ચાંદીના બિસ્કીટ તરીકે બતાવી લોકોને અસલ સોના તથા ચાંદીના ભાવે આપી લોકો સાથે મોટા પ્રમાણમાં છેતરપીંડી કરવાની તજવીજમાં હતા. તેમજ ભારતીય ચલણી નોટોની કલર પ્રિન્ટ વાળા બંડલોને અસલ ચલણી નોટો તરીકે ચલણમાં ચલાવવાના હતા અને ભારતીય ચલણી નોટોની બીજી કલર પ્રિન્ટો કાઢી ચલણમાં ચલાવવા માટે કોરા કાગળો કાપીને બંડલો પણ તૈયાર રાખેલ હતા પણ તેઓ કોઈ મોટી છેતરપિંડી આચરે તે પહેલા જ ગુજરાત ATSએ તેમને ઝડપી લીધા હતા.

આ પણ વાંચો - Oh My God..પેપરલીક કાંડના આરોપીઓ આ રીતે પેપર વેચવાના હતા