ગરબાથી પ્રભાવિત થયાં ભારતના સ્ટાર ઍથ્લેટ્સ, તાળીઓના તાલે ઝુમ્યા, જુઓ તસવીરો

ટોકિયો ઑલિમ્પિક (Tokyo Olympics) ગેમ્સમાં 2020માં 400 મીટર રેસમાં એશિયન રેકોર્ડ બ્રેક કરનાર સ્પ્રિન્ટર અમોજ જેકોબ (Amoz Jacob), ઇંગ્લેન્ડમાં કોમનવેલ્થ ગેમ્સ 2022માં (Commonwealth Games 2022) ત્રિપલ જમ્પમાં ભારતનું પ્રતિનિધિત્વ કરીને ચોથો ક્રમ હાંસલ કરનાર પ્રવીણ ચિથ્રાવેલ અને હાલમાં ગુજરાતમાં યોજાઇ રહેલી 36મી નેશનલ ગેમ્સમાં લોંગ જમ્પમાં ગોલ્ડ મેડલ જીતીને બુડાપેસ્ટમાં 2023માં યોજાનારી વર્લ્ડ ચેમ્પિયનશિપ માટે ક્વોલીફાઈડ થનાર જેસ્વીન ઍલ્ડ્રિને ગાંધીનગર કલ્ચરલ ફોરમમાં મન મૂકીને ગરબા કર્યા હતા.

ખેલૈયાઓ પાસેથી તેમણે GCF ગ્રાઉન્ડમાં જ ગરબાના સ્ટેપ શીખ્યા અને પછી તુરંત તાળીઓના તાલે ખુબ સરસ રીતે ગરબા કર્યા હતા. ગુજરાતની આ ભાતીગળ પરંપરાથી આ ત્રણેય રમતવીરો અત્યંત પ્રભાવિત થયા હતા.

ગાંધીનગર કલ્ચરલ ફોરમમાં છઠ્ઠા નોરતે ગાંધીનગરના મેયરશ્રી હિતેશ મકવાણા, તેમના ધર્મપત્ની અને ગુજરાતી ફિલ્મોના જાણીતા અભિનેત્રી રોમા માણેક, ડેપ્યુટી મેયરશ્રી પ્રેમલસિંહ ગોલ અને સ્ટેન્ડિંગ કમિટીના ચેરમેન શ્રી જશુભાઈ પટેલે માતાજીની આરતી ઉતારી હતી. તેમની સાથે પૂર્વ મેયર શ્રીમતી રીટાબેન પટેલ અને શ્રી કેતનભાઇ પટેલ પણ જોડાયા હતા.

કડી વિશ્વ વિદ્યાલયના અધ્યક્ષ સરદાર શ્રી વલ્લભભાઈ પટેલ, ગુજરાતની જાણીતી હાર્ટ હોસ્પિટલ સીમ્સના સંચાલકો શ્રી ડૉ. ધીરેન શાહ, શ્રી ડૉ. હિરેન ધોળકિયા તથા તમામ ડિરેક્ટર્સ ગાંધીનગર કલ્ચરલ ફોરમના ગરબામાં પધાર્યા હતા, એટલું જ નહીં મન મૂકીને ગરબે પણ ઘુમ્યા હતા. ગુજરાતી સુગમ સંગીતમાં શિરમોર એવા વરિષ્ઠ ગાયિકા આદરણીય વિભાબેન રાસબિહારી દેસાઈ અને સુપ્રસિદ્ધ ઉદઘોષિકા માર્ગી હાથી પણ ગાંધીનગર કલ્ચરલ ફોરમના ગરબા માણવા પધાર્યા હતા.

છઠ્ઠા નોરતે સુપ્રસિદ્ધ ગાયિકા હિમાલી વ્યાસ નાઈકે ગાંધીનગર કલ્ચરલ ફોરમના આંગણામાં ખેલૈયાઓને ગરબે રમાડ્યા હતા. શ્રીમતી બિંદુ ઉપાધ્યાય કડવે, શ્રીમતી ફાલ્ગુની હિરેન, શ્રી નયનભાઈ ઉપાધ્યાય, શ્રીમતી આરતી ઋષિકેશ ભટ્ટ અને શ્રી દેવેશ શ્રીવાસ્તવે નિર્ણાયકો તરીકે સેવાઓ આપી હતી.