રાજ્યમાં વરસાદી વાતાવરણ વચ્ચે આજે હળવાથી મધ્યમ વરસાદની આગાહી

દેશમાં હવે ચોમાસાની ઋતુની શરૂઆત થઇ ગઇ છે. વળી ગુજરાતમાં પણ વરસાદે આગમન કરી દીધું છે. સોમવારે સવારે 6 વાગ્યા સુધી ગુજરાતમાં લગભગ અઢી ઈંચથી વધુ વરસાદ નોંધાયો છે, જે સાત ટકાથી વધુ છે. 251 તાલુકાઓમાંથી બે તાલુકાઓમાં 10 ઇંચથી વધુ વરસાદ પડ્યો નથી અને છમાં એક ટીપું પણ પડ્યું નથી. રાજ્યના પાટનગર ગાંધીનગરમાં પણ સ્થિતિ કઇંક આવી જ છે. રવિવારે અમદાવાદમાં ભારે વરસાદ પડ્યો હતો, ત્યારે ગાંધીનગરમાં થોડો વરસાદ પડ્યા બાદ બંધ થતા ગરમી અને બફારામાં વધારો થયો છે. જોકે, આજે લોકોને આ બફારાથી રાહત મળી શકે છે. આજે રાજ્યમાં હળવાથી મધ્યમ વરસાદની આગાહી છે. 

રાજ્યના કુલ 251 તાલુકાઓ પૈકી વલસાડના ઉમરગામમાં સૌથી વધુ 327 મીમી અને સુરતના કામરેજમાં 275 મીમી વરસાદ નોંધાયો છે. જ્યારે 136 તાલુકાઓમાં 50 મીમીથી ઓછો વરસાદ નોંધાયો છે. 82 તાલુકાઓમાં 51 થી વધુ અને 125 મીમીથી ઓછો વરસાદ નોંધાયો છે. 25 તાલુકાઓમાં 126 મીમીથી વધુ અને 250 મીમીથી ઓછો વરસાદ નોંધાયો છે. સોમવારે સવારે 6 વાગ્યા સુધી રાજ્યના કુલ 42 તાલુકાઓમાં 100 મીમી કે તેથી વધુ વરસાદ નોંધાયો છે. આમાંના મોટાભાગના તાલુકાઓ સૌરાષ્ટ્ર અને દક્ષિણ ગુજરાતના છે.