પોલીસ વિભાગ માટે 550 કરોડના ભંડોળને ગુજરાત સરકારની મંજૂરી, સુરતમાં ગૃહ રાજ્યમંત્રીશ્રીની હાજરીમાં ઉજવણી કરાઇ

ગુજરાતમાં હાલ સૌથી વધુ પોલીસ વિભાગમાં ગ્રેડ-પેનો મુદ્દો ચર્ચામાં છે. છેલ્લા ઘણા સમયથી ગ્રેડ-પેને લઈને માગણીઓ પણ કરવામાં આવી રહી છે. પરંતુ તેને પૂર્ણ કરવામાં આવી નથી. પરંતુ હવે આ મુદ્દો પોલીસ વિભાગ પૂરતો સિમિત ન રહેતા રાજકીય પણ થઈ ગયો છે. તેના કારણે હવે ગ્રેડ-પેની જાહેરાત ઝડપથી કરવામાં આવશે કે કેમ તેને લઈને પણ અનેક તર્ક થઈ રહ્યા છે. દરમિયાન મુખ્યમંત્રી ભૂપેન્દ્ર પટેલ દ્વારા પોલીસ વિભાગ માટે 550 કરોડના ભંડોળને મંજૂરી આપી હોવાની જાહેરાત કરવામાં આવી છે. ગૃહ રાજ્યમંત્રી હર્ષ સંઘવી સુરતની મુલાકાતે છે ત્યારે પોલીસ કમિશનર કચેરી ખાતે સાંજે એક કાર્યક્રમમાં ઉપસ્થિત રહ્યા હતા  અને પોલીસ અને તેમના પરિવાર સાથે ઉજવણી કરી  અને  ગરબા  રમ્યા હતા 

સરકાર દ્વારા પોલીસ પરિવારના હિતમાં મહત્વનો નિર્ણય લેવામાં આવ્યો છે. રાજ્ય સરકારે રાજ્ય પોલીસને મોટી ભેટ આપી 550 કરોડના પોલીસ ભંડોળને મંજૂરી આપી છે. રાજ્ય સરકારની આ જાહેરાતથી પોલીસ બેડામાં આનંદની લાગણી છવાઈ ગઈ છે. આ અંગે ગૃહ રાજ્યમંત્રી હર્ષ સંઘવીએ જણાવ્યું કે, તમને બધાને ખુશીના સમાચાર આપવા આવ્યો છું. ગુજરાતના મુખ્યમંત્રી ભૂપેન્દ્ર પટેલે રાજ્યના સૌ જવાનના પગારમાં વધારો કરતાં 550 કરોડથી વધારાની ફાઇલ આજે મંજૂર કરી દીધી છે. પોલીસ પરિવારોની વિવિધ રજૂઆતો પર ધ્યાન આપીને તેનાથી પણ વિશેષ ધ્યાન આપવામાં આવ્યું છે. મુખ્યમંત્રી ભૂપેન્દ્ર પટેલે ગુજરાત પોલીસના પગાર વધારા માટે 28 ઓગસ્ટ 2021ના રોજ એક કમિટી બનાવી હતી. કમિટીએ વિવિધ વિભાગો સાથે બેઠકો યોજી હતી.

કમિટીએ 30 એપ્રિલ 2022ના રોજ રિપોર્ટ સુપરત કરતાં મુખ્યમંત્રીશ્રી  સહિતના અધિકારીઓ સાથે બેઠકોનો દોર ચાલ્યો હતો. ઊંડાણપૂર્વકની ચર્ચા બાદ 550 કરોડ રૂપિયા પોલીસ જવાનોના પગારમાં કેવી રીતે વધારો થઇ શકે તેની વ્યવસ્થા સરકાર દ્વારા કરવામાં આવી છે.

LRD: પહેલા પગાર 2,51,100 રૂપિયા હતો હવે 3,47,250 કરવામાં આવ્યો છે.

કોન્સ્ટેબલ: પહેલા પગાર 3,63,660 હતો.હવે 4,16,400 રૂપિયા કરવામાં આવ્યો છે.

હેડ કોન્સ્ટેબલ: પહેલા પગાર 4,36,654 હતો, જે 4,95,394 કરવામાં આવ્યો છે.

એએસઆઇ: પહેલા પગાર 521354 હતો, જે 584094 કરવામાં આવ્યો છે.

એલઆરડી - 96150

પોલીસ કોન્સ્ટેબલ - 52740

હેડ કોન્સ્ટેબલ - 58740

એએસઆઇ - 64740