આ 3 ધારાસભ્યોએ કહ્યું કે 'અમે ભાજપને સમર્થન આપીશું'

ગુજરાત વિધાનસભા (Gujarat Assembly)નું આજે 1 દિવસ સત્ર શરુ થયું છે. ત્યારે 3 વિધાનસભા બેઠક પરથી અપક્ષ તરીકે ચૂંટાયેલા 3 ધારાસભ્યોએ ભાજપ (BJP)ને ટેકો જાહેર કર્યો છે. વાઘોડીયા, બાયડ અને ધાનેરાના 3 અપક્ષ ધારાસભ્યોએ મંગળવારે રાજ્યપાલ સમક્ષ જઇ ભાજપને સમર્થન આપ્યું છે.

વિધાનસભાની તાજેતરની ચૂંટણીમાં ભાજપને 156 બેઠકો મળી હતી જ્યારે 3 અપક્ષ ઉમેદવાર ચૂંટાયા હતા. વિધાનસભાના સત્રના દિવસે વાઘોડીયા, બાયડ અને ધાનેરાના 3 અપક્ષ ધારાસભ્યોએ રાજ્યપાલ સમક્ષ જઇને ભાજપને સમર્થન આપ્યું હતું. આ અંગે બાયડના બાયડના ધારાસભ્ય ધવલસિંહ ઝાલાએ કહ્યું કે અમે ત્રણેય સભ્યો મૂળ ભાજપના જ હતા અને અમે લાગણીથી  ભાજપ સરકાર સાથે જોડાયા છીએ તેથી અમે સરકારને સમર્થન આપ્યું છે. તેમણે કહ્યું કે અમને વિશ્વાસ છે કે, આ સરકાર પ્રજાનું હિત વિચારે છે અને સમગ્ર ગુજરાતનો જનમત ભાજપને મળ્યો છે.

આ અંગે વાઘોડીયાના  અપક્ષ ધારાસભ્ય ધર્મેન્દ્રસિંહ વાઘેલાએ કહ્યું કે પ્રજાની ઈચ્છા હતી અને તેમના માન ખાતર ચૂંટણી લડ્યો હતો. અમે અમારા કાર્યકરો અને સમર્થકો સાથે મિટિંગ કરીને નિર્ણય કર્યો છે. તેમણે કહ્યું કે અમારા વિસ્તારમાં વિકાસના અને પ્રજાલક્ષી કર્યો થાય માટે સમર્થન જાહેર કર્યું છે.

બીજી તરફ ધાનેરાના અપક્ષ ધારાસભ્ય માવજીભાઈ દેસાઈએ પણ કહ્યું કે  પ્રજાએ વિકાસના કામો માટે ચૂંટ્યા હોય ત્યારે સરકારના ભાગરૂપે પ્રજાનું કામ કરવું જોઈએ. તેમણે કહ્યું કે  પ્રધાનમંત્રી, અમિત શાહ અને મુખ્યમંત્રીથી પ્રેરાઇને સરકારને સમર્થન જાહેર કર્યું છે.  પ્રજાને વિશ્વાસમાં લઇને સમર્થન સરકારને આપ્યું છે. તેમણે એમ પણ કહ્યું કે  વિપક્ષમાં રહીને પ્રજાલક્ષી કર્યો ન થઈ શકે. 

આ પણ વાંચો--ગુજરાત વિદ્યાપીઠના કુલપતિ શ્રીઆચાર્ય દેવવ્રતજીની સાથે લેડી ગવર્નર શ્રીમતી દર્શનાદેવી સ્વચ્છતા અભિયાનમાં જોડાયા