ગુજરાત વિધાનસભા ચૂંટણીમાં 10,357 શતાયુ મતદારો, અમદાવાદ જિલ્લામાં છે સૌથી વધુ

ગુજરાત વિધાનસભાની ચૂંટણી આ વખતે બે તબક્કામાં થવાની છે. 1 ડિસેમ્બરના રોજ પ્રથમ તબક્કાની 89 બેઠકો પર ચૂંટણી થવાની છે. ત્યારે 5 ડિસેમ્બરના રોજ બીજા તબક્કાની 93 બેઠકો પર ચૂંટણી થશે, વળી તેનું પરિણામ 8 તારીખે જાહેર થશે. આ બન્ને તબક્કામાં કુલ 4,91,35,400 મતદારો ભાગ લેશે જેમાંથી 10,357 શતાયુ મતદાતા એટલે કે 100 વર્ષ કે તેથી વધુ વયની આયુ ધરાવતા મતદાતાઓ લોકશાહીને વધુ મજબૂત બનાવવા પોતાના મતાધિકારનો ઉપયોગ કરશે.

ગુજરાત વિધાનસભાની ચૂંટણીના પ્રથમ તબક્કામાં રાજ્યના 19 જિલ્લાઓમાં મતદાન થશે, જ્યારે બીજા તબક્કામાં 14 જિલ્લાઓમાં મતદાન યોજાશે. આ ચૂંટણીમાં લગભગ 5 કરોડ મતદાતાઓ ભાગ લેવાના છે. જેમાંથી 10,357 શતાયુ મતદાતા છે. મુખ્ય નિર્વાચન અધિકારી શ્રીમતી પી. ભારતીના જણાવ્યા અનુસાર, "રાજ્યમાં વિધાનસભાની ચૂંટણીમાં કુલ 10,357 શતાયુ મતદાતાઓ પૈકી પ્રથમ તબક્કામાં 89 બેઠકો પર યોજાનાર ચૂંટણીમાં 5,115 જ્યારે બીજા તબક્કામાં 93 બેઠકો પર 5,242 શતાયુ મતદાતાઓ મતદાન કરશે." રાજ્યમાં સૌથી વધુ શતાયુ મતદાતા અમદાવાદમાં છે. અહીં કુલ 1,500 શતાયુ મતદાતાઓ છે. આ ઉપરાંત વડોદરામાં 716, ભાવનગરમાં 628, રાજકોટમાં 547 અને દાહોદ જિલ્લામાં 531 મતદાતાઓ છે. જ્યારે રાજ્યમાં સૌથી ઓછા શતાયુ મતદાતાઓ ડાંગમાં છે. અહીં કુલ 08 શતાયુ મતદાતાઓ છે. ઉપરાંત તાપીમાં 67, નર્મદામાં 69, પોરબંદરમાં 109 તેમજ પાટણ જિલ્લામાં 125 મતદાતાઓ નોંધાયા છે. 

વળી આ ઉપરાંત બનાસકાંઠામાં 382, ગાંધીનગરમાં 260, મહેસાણામાં 238, અરવલ્લીમાં 200, સાબરકાંઠામાં 164 તેમજ પાટણ જિલ્લામાં 125 શતાયુ મતદારો નોંધાયા છે. જ્યારે સૌરાષ્ટ્રમાં ભાવનગર જિલ્લામાં 628, રાજકોટમાં 547, કચ્છમાં 444, જુનાગઢમાં 395, અમરેલીમાં 372, જામનગરમાં 298, ગીર સોમનાથમાં 278, સુરેન્દ્રનગરમાં 278, મોરબીમાં 175, દેવભૂમિ દ્વારકામાં 174, બોટાદમાં 168 તેમજ પોરબંદરમાં 109 શતાયુ મતદારો છે. મધ્ય ગુજરાતમાં વડોદરામાં 716, દાહોદમાં 531, આણંદમાં 332, ભરૂચમાં 312, ખેડામાં 280, પંચમહાલમાં 237, છોટાઉદેપુરમાં 145, મહિસાગરમાં 132 તેમજ નર્મદા જિલ્લામાં 69 શતાયુ મતદારો છે. આ ઉપરાંત દક્ષિણ ગુજરાતમાં સૂરત જિલ્લામાં 422, વલસાડમાં 238, નવસારીમાં 133, તાપીમાં 67 તેમજ ડાંગ જિલ્લામાં 08 શતાયુ મતદારો નોંધાયા છે.

અમદાવાદમાં 100 વર્ષના સૌથી વધુ 1500 જેટલા મતદારો ઘરેથી મતદાન કરવાના છે. હાલમાં 80 વર્ષથી વધુ વયના 1.31 લાખથી વધુ મતદારો અમદાવાદમાં છે. ચૂંટણી પંચે 80 વર્ષથી વધુ વય ધરાવતા મતદાતાઓ કે જેમણે ઘરે બેઠા મતદાન કરવાની ઈચ્છા વ્યક્ત કરી છે, તેમના ઘરે જઈને મતદાન કરાવવાની વ્યવસ્થા ગોઠવવામાં આવી છે. જે વરિષ્ઠ મતદારોએ મતદાન કેન્દ્ર પર જઈને મતદાન કરવું હોય તેમના માટે વિશેષ સવલતો ઊભી કરવામાં આવી છે. જેમાં 80 વર્ષથી વધુ વય ધરાવતાં વરિષ્ઠ નાગરિકો ઉપરાંત, દિવ્યાંગજનો અને કોવિડ પ્રભાવિત વ્યક્તિઓ માટે ટપાલ મતપત્ર દ્વારા મતદાન કરવાની સુવિધા આપવાની જોગવાઈ કરવામાં આવી છે. જે મતદારોએ નિયત સમયમર્યાદામાં જરૂરી વિગતો સાથે ફોર્મ-12 ડી ભરીને આપ્યું છે, તેમને ઘરે બેઠા મતદાનનો લાભ મળશે.