ગુજરાતનો વેક્સિનેશન અભિયાનમાં રેકોર્ડ, વેક્સિનેશન 10 કરોડને પાર

વેક્સિનેશન અભિયાનને સફળ બનાવવા માટે રાજ્ય સરકારે જનજાગૃતિ અભિયાન ચલાવ્યો, તો આરોગ્ય વિભાગની ટીમે ગુજરાતના છેવાડાના ગામડાઓ સુધી વેક્સિનેશન અભિયાન પહોંચાડ્યું. વેક્સિનેશન અભિયાન માટે રાજ્ય સરકારે 'હર ઘર દસ્તક અભિયાન' શરૂ કર્યુ હતું. શરૂઆતના તબક્કામાં રસી લેવા માટે લોકોને સમજણ આપવી પડી હતી. કેટલીક પરિસ્થિતિમાં આરોગ્ય વિભાગની ટીમને લોકોના અયોગ્ય વર્તનનો પણ ભોગ બનવું પડ્યુ હતું. 

પ્રધાનમંત્રી નરેન્દ્ર મોદીએ ડિસેમ્બરના અંતમાં 15 થી 17 વર્ષના તરૂણોમાં વેક્સિનેશન અભિયાન શરૂ કરવાની જાહેરાત કરી હતી. રાજ્ય સહિત દેશભરમાં 3 જાન્યુઆરીથી તરૂણોમાં વેક્સિનેશન અભિયાન શરૂ કરવામાં આવ્યું. 10 જાન્યુઆરીથી કોરોના વોરિયર્સ, ફ્રન્ટલાઈન વર્કર્સ અને સિનિયર સિટીઝનોને પ્રિકોશન ડોઝ આપવાની શરૂઆત કરવામાં આવી. મહત્વનું છે કે ગુજરાત વેક્સિનેશન અભિયાનમાં દેશમાં અગ્રેસર રહ્યું છે અને રાજ્ય સરકારને રસીકરણમાં શ્રેષ્ઠ કામગીરી બદલ એવોર્ડ પણ મળ્યો છે.

રાજ્યના આરોગ્ય મંત્રી ઋષિકેશ પટેલની ઉપસ્થિતમાં અમદાવાદના સનાથલ ગામમાં 10 કરોડ વેક્સીનનો રેકોર્ડ બન્યો. રાજ્યમાં 15થી 17 વર્ષ સુધીના 93 ટકા તરૂણો વેક્સિનેશન બાદ સુરક્ષિત છે. પ્રધાનમંત્રી મોદીએ 16 જાન્યુઆરી 2021ના દિવસે રસીકરણના મહા અભિયાનની શરૂઆત કરાવી હતી અને એક વર્ષના ગાળામાં ગુજરાતે 10 કરોડ વેક્સિનેશનનો રેકોર્ડ બનાવ્યો છે.