દેશમાં છેલ્લા 24 કલાકમાં કોરોનાના કેસમાં ઘટાડો, 31 લોકોના થયા મોત

ચીન સહિત અન્ય દેશોમાં કોરોનાના વધતા ખતરાને જોતા ભારતમાં પણ સાવચેતી રાખવામાં આવી રહી છે. ઘણા નિષ્ણાતો કહે છે કે ભારતમાં પણ કોરોનાની ચોથી લહેર આવી શકે છે. જોકે, તાજેતરમાં પરિસ્થિતિ કંટ્રોલમા દેખાઇ રહી છે. આજે નોંધાયેલા કોરોનાના કેસની વાત કરીએ તો છેલ્લા 24 કલાક 1270 નવા કેસ સામે આવ્યા છે. 

વિશ્વના દેશોમાં ઝડપથી ફેલાઇ રહેલી કોરોનાની લહેરને જોતા ભારત સરકાર ફરી એકવાર સતર્ક થઈ ગઈ છે. ફરી વધતા કોરોનાને જોતા સરકાર દેશના લોકોને બૂસ્ટર ડોઝ લાગુ કરવાની પણ યોજના બનાવી રહી છે. આ વચ્ચે આજે કોરોનાના કેસમાં ઘટાડો જોવા મળી રહ્યો છે. કેન્દ્રીય આરોગ્ય મંત્રાલય દ્વારા જાહેર કરવામાં આવેલા આંકડા અનુસાર, ભારતમાં સોમવારે છેલ્લા 24 કલાકમાં 1,270 નવા કોવિડ-19 કેસ નોંધાયા છે, જેમાં કોવિડ-19 કેસમાં ઘટાડો નોંધાયો છે. ભારતમાં સક્રિય COVID-19 કેસની સંખ્યા વધીને 15,859 થઈ ગઈ છે. સવારે અપડેટ કરાયેલા ડેટામાં 31 નવા મૃત્યુ સાથે મૃત્યુઆંક વધીને 5,21,035 થયો છે. મંત્રાલયે કહ્યું કે, સક્રિય કેસોમાં કુલ સંક્રમણના 0.04 ટકાનો સમાવેશ થાય છે. ભારતમાં અત્યાર સુધીમાં 1,83,26,35,673 રસીકરણ કરવામાં આવ્યું છે. આ રોગમાંથી ઠીક થનારા લોકોની સંખ્યા વધીને 4,24,83,829 થઈ ગઈ છે, જ્યારે મૃત્યુ દર 1.21 ટકા નોંધાયો છે.