વંથલી ફ્રૂટ માર્કેટમાં ચીકુની મબલખ આવક, જો કે ગત વર્ષની સરખામણીએ મળી રહ્યા છે ઓછા ભાવ

હાલ વંથલી ફ્રુટ યાર્ડમાં ચીકુની દરરોજ પાંચ થી છ હજાર ગુણીની આવક થઈ રહી છે જેનો ભાવ 400 થી લઈને 700 રૂપિયા પ્રતિ મણ સુધીનો રહે છે. જો કે આ ભાવ ગત વર્ષની સરખામણીએ 200 થી 400 રૂપિયા જેવો ઓછો છે, ગત વર્ષે 800 થી 1100 રૂપિયા પ્રતિ મણ નો ભાવ હતો જે ચાલુ વર્ષે ઘટીને 400 થી 700 રૂપિયાનો છે, આ ભાવના ઘટાડાનું કારણ છે કે ચાલુ વર્ષે કમોસમી વરસાદને કારણે ચીકુના પાકને નુકશાન થયું છે, તેથી જોઈએ તેવો ફાલ નથી મળ્યો, જો કે ઉત્પાદન પર કોઈ ખાસ અસર નથી પરંતુ વાતાવરણ ની અનિયમિતતા અને કમોસમી વરસાદને કારણે ચીકુ ને થયેલ નુકસાનના ભાગરૂપે ભાવમાં ઘટાડો નોંધાયો છે, જેની બાગાયતી ખેડૂતોને સીધી અસર પહોંચી છે. ત્યારે બાગાયતી ખેડૂતો સરકાર પાસે યોગ્ય વળતરની અપેક્ષા સેવી રહ્યા છે.

જો કે ભલે ચીકુના ઉત્પાદન પર થોડી અસર પડી હોય તેમ છતાં વંથલી ફ્રુટ યાર્ડમાં ચીકુની આવક થઈ રહી છે તેમ તેનું વેચાણ પણ થઈ રહ્યું છે. સ્થાનિક બજાર ઉપરાંત જૂનાગઢ સહીત સમગ્ર રાજ્યમાં વંથલીના ચીકું પેકીંગ કરીને મોકલવામાં આવે છે. અન્ય પ્રદેશના ચીકુ પાકી ગયા પછી થોડા કાળા પડી જાય છે પરંતુ વંથલીના ચીકુ પાકી ગયા પછી પણ સાકર જેવા મીઠાં અને તેના દેખાવમાં કોઈ ફરક પડતો નથી અને ટકાઉ પણ હોય છે તેથી વંથલીના ચીકુની માંગ રહે છે.

આ પણ વાંચો ઃ દાંતાના ખેડૂત દેવજીભાઇ તાઇવાનના પપૈયાની ખેતી દ્વારા કરે છે લાખ્ખોની કમાણી