અમદાવાદ: AK-47 અને AK-56ના પાર્ટ્સને સપ્લાય કરનાર ક્રાઈમ બ્રાન્ચના સંકંજામાં

પિતાની સારવારના નામે આવીને કરી ગેરકાયદે પ્રવૃતિ
પકડાયેલો આરોપી યમનમાં છૂટક મજૂરી અને કેતના પ્લાન્ટની ખેતી કરી ગુજરાન ચલાવે છે.તેના પિતાને હૃદયની તકલીફ હોવાથી વર્ષ 2018 માં મુંબઇ ખાતે સ્ટેન્ટ મુકાવ્યું હતું, અને દર વર્ષે મેડિકલ ચેકઅપ માટે મુંબઈ આવવાનું રહેતું હોવાથી પિતાની સારવારના બહાને મેડિકલ ચેકઅપ માટે વિઝા મેળવી 2021માં યમનથી મુંબઈ આવ્યો હતો. મુંબઈમાં CBD વિસ્તારમાં આવેલી એક હોટલમાં 28 દિવસ રોકાયો હતો.જે દરમિયાન 19 કે 20 નવેમ્બરના રોજ મુંબઈની એપોલો હોસ્પિટલમાં ચેકઅપ કરાવી પિતાને યમન પરત મોકલ્યા હતાં.
 
અમદાવાદની કંપનીઓમાં પાર્ટસ બનાવ્યાં
યમનના મિત્ર મોહમ્મદ કાસીમના જણાવ્યા અનુસાર અત્યાધુનિક હથિયાર રાઇફલના પાર્ટ્સ બનાવવાના પ્રયત્નો કર્યા. 1લી જાન્યુઆરીએ તેણે મુંબઈથી અમદાવાદમાં આવીને રાયફલના પાર્ટસના મેઝરમેન્ટ સાથેના ફોટાના આધારે ડિઝાઇન બાબતે ઓનલાઇન સર્ચ કર્યા હતું. જે બાદ શહેરના ઇન્ડસ્ટ્રીયલ વિસ્તારોમાં જઈને તપાસ કરી ઓઢવ જીઆઇડીસી ખાતે આવેલી ડી.કે એન્જિનીયરિંગ કંપનીમાં જઈને સેલ્સમેન તરીકે પોતાની ઓળખાણ આપી હતી. તેમજ જુદી જુદી મશીનરીના સ્પેરપાર્ટ બનાવતો હોવાનું જણાવી સૌપ્રથમ રાઇફલના પાર્ટસની જુદી-જુદી ચાર ડાઈ બનાવી હતી.  જે ડાઈના આધારે તેણે કઠવાડા જીઆઈડીસીમાં આવેલી મારુતિ ઇનવ સ્ટીલ કસ્ટ, તેમજ કલ્પેશ અલોયેઝ કંપનીમાં રાયફલ બનાવવાના પાર્ટ્સનો ઑર્ડર પણ આપ્યો હતો. આરોપી આ તમામ પાર્ટ્સ યમનમાં ખાતે મુનિર મોહમ્મદ કાસીમને કાર્ગો મારફતે સપ્લાય કરવાનો હતો.

ઓઢવ અને કઠવાડા GIDCમાંથી રાયફલ બનાવવાના પાર્ટ્સ રિકવર કર્યા
ક્રાઈમ બ્રાન્ચે ઓઢવ જીઆઇડીસી અને કઠવાડા જીઆઈડીસીમાં આવેલી કંપનીઓમાં સર્ચ કરી રાયફલ બનાવવાના પાર્ટ્સ રિકવર કર્યા છે. જેમાં એક લાખની કિંમતની રાયફલના પાર્ટ્સ બનાવવાની ડાઈ સહિત અન્ય જુદા જુદા સામાન મળીને એક લાખ ચાર હજારથી વધુનો મુદ્દામાલ તેમજ રાયફલના પાર્ટ્સ, સેમ્પલની ડિઝાઇન કરેલા કાગળો પણ કબજે કર્યા છે.પકડાયેલા આરોપી સાથે આ ગુનામાં અન્ય  કોઇ સ્થાનિક લોકોની સંડોવણી છે કે કેમ તેમ જ આરોપી છેલ્લા અઢી મહિનાથી ભારતમાં આવ્યો હતો, તે દરમિયાન કોને કોને મળ્યો અને રાઈફલના પાર્ટસ બનાવડાવી યમન ખાતે સપ્લાય કર્યા છે કે કેમ તેમજ આરોપી અન્ય કોઈ ગુનામાં સામેલ છે કે કેમ તે અંગે ક્રાઈમ બ્રાન્ચે તપાસ શરૂ કરી છે.