હાર્દિક પટેલના કોંગ્રેસ પર આકરા પ્રહાર, કહ્યું હું ત્રણ વર્ષે પસ્તાયો છું

 તેઓ કેસથી ડરી ગયા છે તેવા આરોપનો જવાબ આપતાં હાર્દિકે કહ્યું કે, મારી પર કેસ ના હોત તો પણ હું કોંગ્રેસ છોડી જ દેત. હું કેસથી ડરતો નથી. હું 9 મહિના જેલમાં રહ્યો છું અને હવે મને કેટલી વાર જેલમાં તેઓ મોકલી શકે. 

જીગ્નેશ મેવાણીના આરોપો અંગે હાર્દિક પટેલે કહ્યું કે, હું ભગવાનને પ્રાર્થના કરું છું કે તેમની સાથે મારા જેવું ના થાય 

તેમણે કહ્યું કે ચૂંટણી કયાંથી લડીશ તે હજુ નક્કી કર્યું નથી અને સમય આવશે ત્યારે તેઓ આ બાબતે જાણ કરશે. 

કોંગ્રેસ કેમ છોડી તેના જવાબમાં હાર્દિકે ફરી વાર કહ્યું કે, મને કોઇ જવાબદારી નક્કી કરવામાં આવે તે જ મારી વાત હતી. દુઃખ પણ ઘણા હતા. મારો બેનરમાં ફોટો પણ લગાવતા ન હતા. દાહોદમાં પાંચ મિનિટનો સમય કાઢી શકયા ન હતા. અમે રાહુલ ગાંધીને જોઇને કોંગ્રેસમાં જોડાયા હતા પણ સાચા માણસને સાચવી ના શકે ત્યાં રહેવાય નહીં તેમ તેમણે કહયું હતું. તેમણે વધુ આરોપ લગાવતાં કહ્યું કે, જયારે પણ રાહુલ ગાંધી જોડે તેઓ વાત કરતાં ત્યારે તેમનું ધ્યાન હંમેશાં મોબાઇલમાં જ રહેતું હતું. 

હાર્દિકે કહ્યું કે  મારા પત્તા હંમેશાં ખુલ્લા છે. મેં કયારેય કશું છુપાવ્યું નથી. સીડી વખતે મેં કહ્યું હતું કે, હું યંગ જનરેશનનો છું. પછી લોકો તમને પસંદ રાખે તો તમે નેતા. મેં લોકોનું સારું કર્યું છે. 

તેમણે એમ પણ કહ્યું કે, હું નરેશ પટેલને ચાર પાંચ દિવસ પહેલા મળ્યો હતો અને  મેં તેમને કહ્યું કે મારી સાથે આવું થયું છે. તમે સમજી વિચારીને નિર્ણય લેજો.  હું ત્રણ વર્ષે પસ્તાયો છું. નરેશ પટેલના આગમનથી મને કોઇ ઈનસિક્યોરીટી ન હતી તેમ તેમણે જણાવ્યું હતું.   

તેમણે કહ્યું કે, હું જયાં જઇશ ત્યાંથી લોકોના પ્રશ્નો સાંભળીશ અને તકલીફોમાં ભાગીદાર બનીશ. મને ભરોસો છે કે હું જયાં પણ જઇશ કે જનતાનો સાથે સાથ નહીં છોડું.