અમદાવાદમાં હોસ્પિટલમાં આગથી દંપતીનું મોત

અમદાવાદ (Ahmadabad)ના નારણપુરા વિસ્તારમાં આવેલી મોદી આઇ કેર હોસ્પિટલ (Hospital)માં આગ (Fire) લાગી હોવાના સમાચાર મળી રહ્યા છે. આગમાં દંપતીનું મોત થયું છે. ફાયર બ્રિગેડ સ્થળ પર પહોંચી રહી છે. 

પ્રાપ્ત માહિતી મુજબ અમદાવાદના નારણપુરા વિસ્તારમાં આવેલી મોદી આઇ કેર હોસ્પિટલમાં મોડી રાત્રે 3 વાગ્યાની અરસામાં આગ લાગી હતી જેમાં દંપતીનું મોત થયું છે. આગમાં દાઝી જવાના કારણે પતિ-પત્નીનું મોત થયું હોવાનું જાણવા મળે છે. 

હોસ્પિટલના પહેલા માળેથી પતિ-પત્નીના મૃતદેહ મળ્યા હતા. હાલ તંત્રના અધિકારીઓ સ્થળ પર પહોંચ્યા છે અને ફાયર બ્રિગેડની ટીમ પણ પહોંચી છે. આગ લાગવાના કારણો વિશે પણ તપાસ કરાઇ રહી છે. ઉલ્લેખનિય છે કે હોસ્પિટલમાં આગ લાગવાની ઘટનાઓ બને ત્યારે ફાયર સેફ્ટીના સાધનો વિશે અવાર નવાર ચર્ચાઓ ઉઠે છે પણ નિયમીતપણે ઇન્સ્પેક્શન કરાય છે કે કેમ તે વિશે સવાલો પણ જોવા મળે છે. નારણપુરાના ધારાસભ્ય પણ સ્થળ પર પહોંચ્યા છે. મૃતક દંપતીનું નામ નરેશ પારઘી અને હર્ષાબેન પારઘી હોવાનું જાણવા મળે છે અને તેઓ મુળ રાજસ્થાનના હતા. 

ઘટના બાદ સવાલ ઉભો થયો કે મોડી રાત્રે આગ લાગી અને દંપતીનું મોત થયું હોવા છતાં કેમ રાત્રે જ કોઇને જાણ ના થઇ. રાત્રે એકાએક આગ લાગી અને લોકોને અને સ્ટાફને સવારે ખબર પડી હતી. હોસ્પિટલમાં ફાયર સેફ્ટી હોવાનું જાણવા મળે છે પણ તેમ છતાં આ ઘટના બની હતી. ફાયર સિસ્ટમ ચાલુ હાલતમાં હોવાનું ફાયર બ્રિગેડે જણાવ્યું છે. 

આ અંગે હોસ્પિટલના માલિક ડો.ધવલ મોદીએ જણાવ્યું કે આગ લાગવાનો બનાવ મોડી રાત્રે અથવા વહેલી સવારે બન્યો હોય તેવું લાગે છે. ડે કેર સેન્ટર હોવાથી રાતે ફક્ત સિક્યુરિટી સ્ટાફ જ રહેતો હોય છે. આ ઘટનાની મને જાણ થતા જ મે પોલીસ અને ફાયર વિભાગને જાણ કરી હતી. તેમણે કહ્યું કે  આગ લાગી તે સમયે એલાર્મ વાગ્યું કે નહિ તે તપાસ નો વિષય છે. તમામ સ્ટાફને ફાયરની તાલીમ પણ આપવામાં આવી હતી. તેમણે વધુમાં કહ્યું કે રાત્રીના સમયે ફક્ત સિક્યોરિટી સ્ટાફ હોવાથી સીસીટીવી બંધ રાખવામાં આવતા હતા.

આ પણ વાંચો--હોસ્ટેલમાં છૂટથી રહ્યા બાદ વિદ્યાર્થીઓને ઘેર રહેવામાં પડી રહી છે મુશ્કેલી..